Wientrio 2025 Oetgerope

Zaoterdaag 25 jannewari is tiejes ós Prinsegala ‘t 56ste trio van vastelaovesvereiniging
De Wien oetgerope in Domani Venlo. Dit jaor gaon Prins Rob II (Geraedts), adjudant
Joost (Wetzels) en adjudant Floris (Lina) ós vereiniging veur as Wientrio 2025.

Gaer stelle weej ós trio aan óg veur.

Rob_4425_bew

Prins Rob II is gebaore en getaoge aan de andere kant van de brök in Blierick, wao hae de ierste 24 jaor van zien laeve gewoeënd haet. Inmiddels woeënt hae alweer 27 jaor aan deze kant van de brök in Venlo-Oeës met Monique en eur blage Bram en Milou. In ’t dageliks laeve is hae al inkele jaore directeur beej ‘Adrem Poort- en Afrasteringsprojecten’. Ziene vreeje tied bringk hae gaer door met zien gezin en vrinde en bestaejt hae gaer aan zien hobbies, zoeë wie tennisse, mountainbike, wandele, skieje, op verkansie gaon en neteurlik met vrinde vastelaovend viere.

Adjudant Joost is midde in ‘t vastelaovessezoen gebaore in Heerlen, verhoesde al
gauw nao Numwaege en oetintelik nao Blierick. Same met Tamara en eur blage Juulke en Sophie woeënt hae alweer 7 jaor in Herwijnen nao jaore euver de wereld gezworve te hebbe (Utrech, Wene, Azië, Sao Paulo, London). Maar idder jaor kómme zeej gaer truuk nao Venlo um heej met femilie en vrinde vastelaovend te viere. Hae is werkzaam beej de keuninklikke A-ware en in ziene vreeje tied geneet hae van kaoke, lekker aete en drinke, meziek en good gezelschap.

Joost_4441_bew_DEF
Floris_4434_bew_DEF

Adjudant Floris is opgegreujd in de binnestad wao hae as jónge blaag mei holp in de hieremódezaak van zien elders in de Klaosstraot. Nao inkele jaore met zien Hanneke in Lieëwarde gewoeënd te hebbe, zien zeej oetintelik truuk nao Venlo gekómme wao zeej same met eur blage Isa, Suze en Ruben op de Herungerwaeg in Venlo-Oeës woeëne. Same met Hanneke en eure cómpagnón haet hae in Straele ein bedrief in medische apparatuur en disposibles. In ziene vreeje tied kaok hae gaer en is hae regelmaotig te vinde in de gym en op de tennisbaan.

Liefspreuk:
Dees daag waere de moeëjste daag van ós laeve.
Gans Venlo joeks mei, nemus steit d’r naeve.

Jónk of ald, jungske of maedje.
Vastelaovend beej De Wien.
Waat ein plaetje!