Jeugkemissie
Al waat de groeëte in ‘t groeët doon, duit de jeug in ’t klein. Daoveur zörg groeëtendeils de Jeugkemissie, neteurlik met behölp van vuuel andere kemissies.
In september begint de kemissie al met vergadere, zoeëdet de veurbereidinge van de aktiviteite tiedig geregeld zien.
De Greunveldschoeël en de Wienleje waere benaderd um de jeug te porre um lid te waere van de Raod van Elf of um zich op te gaeve as kandidaat veur ein van de vuuele andere funksies, die jäörliks vakant zien, zoeë wie Prins(es), adjudant, vors, sirremoniemeister of dansmerieke.
Dan kump ’t weekend van de jeug!!
Meistal dónderdaags veur ’t weekend kump ’t nieje jeugtrio in beslaote gezelschap oet. Det is ein hiel gebeure wao de nieje groeëte Wienprins op ein geheime locatie ’t nieje jeugtrio oetröp.
Vriedaag ’s aoves is dan de JoeksAovend. Dit is d’n oetroopaovend dae gehalde wuurt beej brasserie De Witte en wao idderein welkóm is. Op dezen aovend kump ’t nieje jeugtrio officieel oet.
Zaoterdaagmiddaag is de jeugmiddaag veur alle kinder met neteurlik de prissentasie van ’t nieje jeugtrio en optraejes van inkele artieste. Ouk kump de groeëte Wienprins effe kieke. Veur de echte late beslissers zien d’r ouk nog kaarte te koup in brasserie De Witte.
Nao de jeugmiddaag geit ’t ganse jeuggezelschap gezamelik aete. Aansloetend is de receptie. Idder jaor kómme dan weer hiel vuuel minse ’t nieje jeugtrio fillisitere. ’t Is óndertösse ingebörgerd det nao de receptie met meziek remmiedemmie wuurt gemak wies in de late äörkes.
Ein waek later is ’t d’n daag van ‘t groeëte trio, wao ’t jeuggezelschap diek aan bod kump. ’s Morges gaon de dansmeriekes, de vors, de sirremoniemeister en neteurlik ’t jeugtrio nao de H. Mis in de Femiliekerk. Heej nao geit ’t ganse jeuggezelschap op waeg nao Domani veur de groeëte receptie van De Wien wao zeej traditioneel as ein van de ierste groepe de groeëte prins en adjudante fillisitere op eur receptie.
Nao ein waek rös, zien d’r weer ein aantal recepties, die weej neteurlik neet euverslaon. Daags daonao volg ’t champagne-óntbijt beej de groeëte Wienprins en ’t aafloupe van diverse recepties. Same met de groeëte Wienprins op ein buun; waat zien zeej gruuets !
En dan… is ’t al vastelaovend. Te beginne met de Jocus-kinderoptóch op zóndaag, wao weej neteurlik met meitrekke. Aansloetend gaon weej dan ’t kwartet van de Moeraskwaakers fillisitere.
As aafsloeting van eine prachtige vastelaovestied steit d’r veur de jeug op zóndaag nog de “Muts van de Bluts” gepland. ’s Aoves nao de letste receptie wuurt in aetkefee De Alde Mert ’t jeugtrio officieel veur ’t letst dit sezoen op ein ludieke wies de muts aafgezatte.
En dan is ’t gedaon en gaon weej weer langzaam op waeg nao dae nieje start in september.
Geej kint ózze kemissie bereike via e-mail: jeug@dewien.nl
