Zaoterdaag 6 jannewari is tiejes de jaorlikse Prinsegala ‘t 55ste trio van Vastelaovesvereiniging De Wien oetgerope in Domani Venlo. Dit jaor gaon Prins Sander I (Aerts), adjudant Arjan (Heetman) en adjudant Ruud (Alberts) ós vereiniging veur as Wientrio 2024.
Gaer stelle weej ós trio aan óg veur.
Prins Sander I is veur de meiste van óg genne vraemde. As veurzitter van ’t jeuggezelschap van Vastelaovesvereiniging De Wien trek hae same met zien maedje Maud sinds einige jaore de ker binne de Wiener jeugvastelaovend.
Hoewaal hae zien eige jeugvastelaovend onder andere in ‘t Moeraskwaakersriek haet gevierd en veur zien prinselikke taak ouk al is opgeleid beej Jocus Toekóms is hae inmiddels woeënachtig op de Waterleidingsingel in ós eige Wienriek met zien maedje Maud en zoon Quinn.
Ein van zien vuuële hobbies is Joekskepel Dreej Daag Um wao hae as trómpetist ziene muzikale kant luuet zeen. In ‘t dageliks laeve werk hae as inkoupmanager beej Tuincentrum Leurs.
Adjudant Arjan is van oorspróng eine Veldhovense, maar via zien maedje Lisette is hae oetintelik in Venlo-Oeës neergestreke. Op de hei kint geej um geregeld taege kómme op ziene mountainbike en as Ajax-fan wet hae ouk in de Arena ziene waeg te vinde.
Werke duit hae beej de Firma Renewi in Eindhove wao hae as controller de financiën good in de gate held. As schoeënbroor van d’n Hoeëgheid ware dao korte lienkes en kin de femilie Aerts gruuets zien op ein döbbele aafvaardiging in ‘t Wientrio 2024.
Ouk adjudant Ruud is same met zien maedje Sharon, zoon Finn en dochter Noa woeënachtig in ‘t Wienriek.
In ‘t dageliks laeve werk hae in de ICT beej de Firma X-com in Maasbree. Vruuger op de Greunveldschoel en ‘t Marianum gezaete is hae genne vraemde binne ‘t Wienriek.
As ein van de oprichters van Joekskepel Dreej Daag Um hebbe weej hoeëge muzikale verwachtinge en as zoon van adjudant Jos in 2000 is hae noow aan de beurt um ziene Hoeëgheid Sander beej te staon.
Prins Sander I, adjudante Ruud en Arjan gaon de vastelaovend dit jaor in met ‘t motto “Laot dich ens zeen” en haope óg allemaol te zeen op de nog te kómme evenemente, maar neteurlik veural op eur groeëte receptie op zóndaag 21 jannewari um 14.00 oor in Domani Venlo.
