Trio

Prins Ralph stelt zich veur:

Veur die, die mich neet kinne zal ik óg ens gaon vertelle wae dae prins van 2020 is en wie zien laeve der oet zuut:

Ik bin op 22 fibberwari 1968 gebaore in ’t stedje van lol en plezeer. Zoon van Gerard en Mariet Roodbeen. Broor van Harold en Stella.De vastelaovend is mich mit de paplaepel ingegaeve en dao bin ik mien elders ieëwig dankbaar veur.

 

In 1997 bin ik gruuetse pap gewaore van Stan. Óndertösse einen bink van alweer 22 …. Dae woeënt en

werk in ‘t Ierse Dublin. Sinds 2014 bin ik met Nancy same en op 22 september

2017 zien weej in ’t huwelijksbuuetje gestap. Idderen daag weer opnie pries ik mich riek mit mien

vruike, we völle mekaar good aan en ’t is behalve mien vrouw ouk mien allerbeste vriendin.

Ik bin werkzaam beej Stryker as Senior Solution Lead, in ’t kort same gevat bin ik eine hendige

Harry in de automatiseringswereld en zeuk ik nao oplossinge wie dinger nog mekkeliker kinne.

Mien hobbies zien: ( heb geej efkes? ) oetstepkes make …wiekendjes weggaon…..op vekansie

gaon…. Ik vind ’t fijn um zoeëvuuel meugelik van de waereld te zeen same mit mien Nance

aan mien zie. Ik kiek gaer nao voetbal wedstrieje van VVVVenlo en Ajax. Sporte det doon ik ouk: waal 3x in de waek. Dök al um zeven oor s’morges. Ik vind ’t heerlik um den daag al sportend te beginne! Ik sport beej Crosbox en doot dao boekse, bigbag en fitness. Det mak det as ik in ’t wiekend op ein feesje waal ens waat pilskes nuttig, ik waat sneller dink: “ach

det sport ik der waal weer aaf!” Vaerder hebbe we ein kat Flip en hónd Broés. Met Broés op de hei gaon wandele zörg beej mich ouk veur ontspanning. Vaerder weer ik gaer umringk door mien femilie en vrinde. Die zien erg belangriek veur mich!

Ik kiek der dan ouk nao oet um same mit mien femilie, vrinde en bekinde van dees kómmende periode einen tied te gaon make um noeëts te vergaete!

 

Vastelaovend same!

Adjudant Marcel stelt zich veur:

Hallo allemao!

Gaer wil ik mich ff aan óg veurstelle, want geej wilt netuurlik allemaol waal weite wae dae adjudant is naeve Hoeëgheid Ralph I. Det zal ik óg ens efkes gaon vertelle; Miene naam is Marcel Schelberg. Zoon van Giel Schelberg (jao dae van de salades) en Annemie Schelberg. Groeëte broor van Nancy Schelberg, veur óg meugelik mier bekind as Nancy Roeëdbein( want zoeë meug ’t zich sinds september 2017 neume) Ik bin dus de schoeënbroor van Ralph. Ik bin veurnamelik opgegreujt op de Straolsewaeg. Vruger waas ik mit de vastelaovend vuuel te vinde beej Tonja beej de Madsonclub en hiel waat eurkes

op de Straolsewaeg beej de Windmeule doorgebrach!

 

Op mien 16e bin ik door ein automobilist van mienen

brommer geschep en um ein hiel langk- neet al te vrolik verhaol- kort same te vatte heb ik vanaaf det

moment vuuel ellende gekind met mien linkerbein. Vuuel gecompliceerde operaties, behandelinge en gashoesopnames

volgde mit al gevolg 30 jaor later in 2014 ein onderbein amputatie. Eine stap in mien laeve dae mich eigenlik allein maar

good haet gedaon. Ik loup door ’t laeve mit ein klikprothese en zeen weer meugelijkhede i.p.v. beperkinge!

Het viere van minnig feesje geit noow dus ouk mit einhiel stök minder pien. En det is te gek!

 

Al mier as 27 jaor bin ik same met mien vruike Ineke waovan al 15 jaor getrouwd. Op 9 November 2005 zien weej gruuetse elders gewaore van ózze zoon Levy, noow sinds inkele maonde 14 jaor. Einen echte puber! Der zien momente det ik um achter ’t behang kin plekke (jao figuurlik dan hé) Maar ik hald van um as gen ander.

 

Mien gezin is miene basis en ik zoel neet weite waat ik zónder eur aan

meus vange. Ik bin werkzaam as sportconsulent beej de gemeinte Venlo (jao, geej laes ’t

good, dao “werk” ik) Ik bied naoschoeëlse activiteite aan, zoeëdet kinder lieg drempelig kinne snuffele aan takke van sport en dan kinne doorstruime nao ‘n vereiniging, ‘t duit mich deug bezig te zien mit ’t motivere / stimulere van jóngere um te gaon sporte. Ik sport zelf net – wie ózze Hoeëgheid -beej Crossbox en fiets dök fanatiek op de mountainbike. Ik heb veurnemes um dit jaor zoeëwaal de Alpe d’Huez as waal de Stelvio op te gaon fietse!

 

2 jaor geleje waas ’t de gemeinte dae ik veur meugde gaon in de Boerebroelof en waas ik Wout. Man waat waas det eine waan tied! Ik heb genaote van de ierste wies de letste minuut! As “echte venlonaor” gaon ik al jaor en daag same met

mien vruike op vastelaovendzóndaag waal ein “bietje vraemp” mót ik bekinne. In Belfeld woeëne vrinde van ós en loupe weej same mei mit d’n optoch. ’t Is eine ganse groeëte groep vrinde, jónk en ald löp dan mei…. Altied hiel gezellig en al dök in de prieze gevalle.

 

En noow dit jaor meug ik – same mit Daan – aan de zie van Hoeëgheid Ralph I staon! Ik heb der zin in um same mit óg allemaol dao ein onvergaetelik fees van te gaon make!

Vastelaovend same!

Adjudant Daniel stelt zich veur:

Daag leef luuj!

Ouk ik wil mich gaer aan óg allemaol veurstelle en kin neet wachte um óg allemaol te

liere kinne de kómmende periode! Miene naam is Daniël van Cleef, getrouwd

met mien leef vruike Rita. We zien al 27 jaor same, ein hielen tied en wet geej

waat? Ik bin um nog steeds neet meug en hald mit gans mien hert van um.

 

Weej zien gezaegend met ‘t hebbe van twieë blage. Twieë maedjes: Demi (15) en Isa (13).

’t Waere al echte dames.Jao, jao…kleine maedjes waere groeët. Mien elders zien Jan en Annie van

Cleef en zeej hebbe mich gemak tot de man dae ik noow gewaore bin. Ik bin de jóngste oet ’t gezin, baove mich heb ik nog

2 breurs, Andre en Patrick. Gebaore bin ik op de Schrijnwerkersstraot en ik kin mich nog good de vastelaovestied herinnere wie ik ein klein menke waas. Beej mien elders thoes mit zien alle nao d’n optoch kieke, alle vrinde en vrindinne ware dan ouk welkóm. Dao woort in daen tied nog mit hiel waat sloek gesmete.

 

Ouk waas ik beej de raod van elf beej …ja, ja ….de Tonnemenkes!Al sinds jaor en daag woeën ik mit mien vruike

in de Vrouwtraasstraot, ’t wienriek dus …. (asof ’t zoeë mót zien) Ik bin altied in veur ein feesje en weer gaer umringk door mien femilie en vrinde. Op vriedaag speul ik competitiebiljart en daonao ….tja det wuurt

dök nogal eine late…

 

O jao , werke doon ik netuurlik ouk ….Aafgeloupe juni waas ik 25 jaor in deens beej de AMI, ein bouwbeslaagbedrief.

Heej werk ik mit vuuel plezeer. Neet allein ik maar mien gans gezin hilt van de vastelaovend. Allebei de dochters zien op schoeël prinses gewaes. aafgeloupe sezoen waas Isa bruuedje van ’t Boerebroelof jeuggezelschap van Jocus en Demi

waas dao getuge. Mien leef vruike waas sökkertante beej ’t Boerebroelofgezelschap van de koeldeljach van Benders.

 

En dit jaor bin ik gewoeën aan de beurt! En ik vind det fantastisch! Ik bin al 28 jaor óntzettend good bevrind met

Nance, ’t vruike van ózze hoeëgheid en zuske van miene collega adjudant Marcel. Det is dus ouk geliek de connectie tösse mich en de andere twieë. Ik bin der van euvertuug det weej mit zien dreeje same mit óg allemaol eine waan tied taegemood

gaon!

Vastelaovend same!