Raod van Elf

De Raod van Elf besteit zoeë wie de naam al duit vermoede oet minimaal elf persoeëne, wao ónder de Vors, de Chef du Protocol en de sirremoniemeister.

Waat doon noow die verschillende ‘raodsleje’ zoeë-al? Te beginne beej de Vors; hae is de veurzitter van de Raod van Elf. De vors wuurt door de jaorvergadering van de vereiniging veur ein periode van veer jaor gekaoze. Hae mak taeves deil oet van ’t bestuur van de vereiniging as aafgevaardigde van de Raod van Elf. De Vors is in ‘t vastelaovessezoen (van de elfde van de elfde wies Aswoensdaag) de spraekbuus van de vereiniging. Boete ‘t sezoen velt die ier te beurt aan de veurzitter. 

De Vors prissenteert ouk de diverse evenemente van de vereiniging. Dink heej beej aan ‘t Wiener Leedjes Festival, Prinsegala, wao ‘t nieje trio wuurt oetgerope, aan de Prónkzitting, de Groeët Venlose Gulpener Hierezitting en aan de diverse recepties.

De sirremoniemeister (de man met de bel) is verantwoordelik veur de Wienmeriekes en net wie de Vors ein stök prissentatie beej de Wien-evenemente. Beej de Prónkzitting haolt de sirremoniemeister, same met zien Wienmeriekes, zoeë wie gebroekelik de artieste van achter oet de zaal de buun op, ónder de klanke van ein bekind Wienleedje en met ‘t luuje van zien bel. Vaerder veurt hae op bevel van de Vors de waal bekinde döbbele of dreej döbbele ‘Wienbol’ oet. 

De Chef du Protocol is in ierste instanste verantwoordelik veur de Prins en zien adjudante. Hae begeleidt ‘t trio vanaaf ‘t móment det zeej aan mekaar veurgesteld waere wies det zeej in november weer aaf mótte traeje. Hae zörg det ‘t trio good gekleid is, mak aafspraoke veur ‘t passe van de mutse en ‘t make van de foto’s.

Zoeë vaer de ‘belangriekste’ functies binne de Raod van Elf. Dink noow aevel neet det de res niks duit, in taegedeil, veur geneumde functies zien binne de raod plaatsvervangers aangeweze, mót ‘t vervoer van de raod geregeld waere, is d’r eine sikkertaris en eine penningmeister nuuëdig zoeëdet idderein waal ein functie haet.

De Raod van Elf begeleidt same met de Wienmeriekes de Prins met zien adjudante vanaaf ‘t móment det zeej oetkómme wies det zeej aaftraeje.

Zin of interesse um ouk ens te bespraeke of de Raod van Elf wat veur dich is? Steur ein e-mail nao vors@dewien.nl um heej ens vreejblievend euver te informere.