Zaoterdaag 14 jannewari is in ein bómvol Domani ós 54ste trio oetgerope. Dit jaor gaon Prins Renee I (Lammen), adjudante Dirk (van Dijk) en Marcel (Betzel) ós vereiniging veur as jubileumtrio. Vors Wienius Eric Martens hech waerd aan dae titel. “Dit trio hebbe weej speciaal oetgekaoze veur ós jubileum. Det zeej door alle corona-perikele ein jaor later oetkómme, duit niks aaf aan deze bezóndere titel”.
Haos anderhalf jaor hebbe zeej in spanning gezaete wennier ‘t moment noow toch zoel kómme wao op zeej daadwerkelik oet mochte kómme.
Gaer stelle weej ós trio aan óg veur.
Prins Renee I zet zich al jaore verdeenstelik in veur vastelaovesvereiniging De Wien in diverse rolle. Zoeë is hae al jaore lid van de Technische Kemissie en ouk van ózze hoeëge wieze Raod van Elf. Óndanks det hae gebaore en getaoge is in Blierick, is Renee toch eine echte Wienbol. Met as veurbeeld zien vruike Nicol waat jaore as Wienmerieke deende en zien schoeënvader John van Leersum zaliger dae um in 2008 veur ging as Hoeëgheid van De Wien. Renee is ouk eine echte femilieman. Same met zien vruike Nicol is hae de gruuetse vader van zoon Siem en dochter Tess. In ‘t dageliks laeve werk hae beej de medische instrumentale deens in ‘t Viecuri gashoes in Venlo.
Adjudant Dirk is van oorspróng eine Holt-Blierikse en woeënt inmiddels al jaore met zien gezin in ‘t riek van de Wortelepin. Al jaore zien hae en zien vruike Jessica, dochters Janey en Lisa vrinde met Hoeëgheid Renee en zien gezin. Ouk adjudant Dirk is eine vereinigingsman. Zoeë is hae same met zien dochters al jaore verbónde aan handbalvereiniging Blierick. Ouk is hae fanatiek brouwer van speciaalbeer. In ‘t dageliks laeve is Dirk werkzaam als facilitair coördinator beej ein alarmcentrale in Geldrop.
Adjudant Marcel is gebaore en woeënachtig in Venlo-Zuid wao hae same met zien Venlo-Zuids vruike Marjo, kinder Saar en Baer resideert in ‘t Kwasteriek. In ‘t dageliks laeve werk hae as planner beej de firma Translog. Ouk binne De Wien is hae genne vraemde. Zoeë is hae al 10 jaor lid van ózze hoeëge wieze Raod van Elf wao hae ziene waeg nao toe vónd met ziene kumpel Paul Klein (zoon van ald Prins Frans III). Inmiddels dreit hae al diverse jaore mei as Chef du Protocol en zörg hae det veur alle trio’s de zake tiptop geregeld zien en de protocolle good waere naogelaef. Behalve dit jaor. Dit jaor meug hae zelf ervare wie ‘t is um aan de andere kant te staon as adjudant van vastelaovesvereiniging De Wien.
Prins Renee, adjudante Dirk en Marcel gaon de vastelaovend dit jaor in met ‘t motto “vastelaovesgelök” en haope óg allemaol te zeen op de nog te kómme evenemente, maar neteurlik veural op eur groeëte receptie op zóndaag 29 jannewari um 14.00 oor in Domani Venlo.
