Vriedaag 16 jannewari is in ein bómvolle Brasserie de Witte tieje de 4e editie van d’n Joeks-Tam-Tam ós nieje jeugtrio oetgerope. Prins Jovi I (Olders) zweit dit jaor same met zien adjudante Quinn (Aerts) en Sten (Lankreijer) de scepter euver ‘t jeugwienriek.
Prins Jovi is 11 jaor ald en is woeënachtig in ‘t Greunveld met zien mam Daisy, hoesvader Kevin, breurke en 2 zuskes. Ouk hónd Baerke mak deil oet van ‘t gezin. Hae zit in groep 8 van de Greunveldschoeël, alzoeë zien letste luuedjes dao. Euver luuedjes gespraoke, hae zwengelt gaer met ziene visgaerd in de vievers van ‘t Greunveld. Hae is fanatiek voetballer beej VVV’03 wao hae speult in de JO13-1. Jovi mak al inkele jaore deil oet van de Raod van Elf van ‘t jeuggezelschap.
Adjudant Quinn is 12 jaor ald en woeënt same met zien elders Maud en Sander op d’n Maagdenberg. Ouk hae is bezig aan zien letste jaor op de Greunveldschoeël. Quinn voetbalt al van kleins aaf aan beej FCV in ‘t Ven, en dit seizoen speult hae in de JO13-2. Quinn viert al vastelaovend vanaaf ‘t móment det hae gebaore is en ouk hae is lid van de Raod van Elf van ‘t jeuggezelschap.
Adjudant Sten is 12 jaor ald en ouk hae zit in groep 8 van de Greunveldschoeël. Hae is woeënachtig in dezelfde straot as adjudant 1 en woeënt dao same met zus Niene en zien elders Nancy en Bas. Ouk haet hae nog ein broor Puck. Handballe duit hae beej Fortes Venlo en de vastelaovend viert hae beej de jeug van de Törfkes. Echter dit jaor mak hae ein oetzóndering um same met zien 2 vrinde de Wienervastelaovend te belaeve.
Ós nieje jeugtrio helt eur receptie op vriedaag 23 jannewari vanaaf 19.45 oor beej Brasserie de Witte op de Parade in hertje stad.
Zeej gaon ós dit jaor veur ónder eure liefspreuk:
As jeugtrio van De Wien gaon weej dit jaor veurop.
En zette same met idderein de tent op de kop.
De vishengels zette weej noow aan de kant.
Want vastelaovend viere, vinde weej vuuels te kwant.
Idder met zien eige vastelaovesverhaole.
Gaeve weej noow gaas, Kiek ós Straole!
VASTELAOVEND SAME!
