
Vriedaag 31 jannewari is in ein bomvolle Brasserie de Witte tièdes de 3e edisie van D’n Joeks-Tam-Tam os nieje jeugtrio oetgerope. Prins Jules I (Nab) zweijt dit jaor same met zien adjudante Susan (Van Eijk) en Pepijn (Kohlen) de scepter euver ut jeugwienrièk.
Prins Jules is 16 jaor ald en is woeënachtig in ut Greunveld met zien zuske Imke en zien mam en pap. Jules is genne onbekinde binne de Jeug van de Wien. De aafgelaope jaore haet hae de functie van Jeugvors Wienius vol euvergave en enthousiasme gedraage. Zien groeëte hobby is musical. Det duit hae met vuuël plezeer beej stickting Stella Duce en op ut Valauascollege. Det letste is auk geliek de schoeël wao op hae zit. Vastelaovend viere duite al vanaaf dette is geboore.
Adjudante Susan woent same met zien zuske Eva en zien elders beej de Veerpaerdjes. Susan is 16 jaor en zit in zien exame jaor van de Havo op ut Valuascollege. As Hobby’s haet ut schildere, teikene en laeze. Tiedes de vastelaovend geit ut met zien vrinde en vrindinne naor de stad. En kiek ut altiëd met bedraag naor de groeëten Optoch as dae daor de Venlose binnestad trek.
Adjudant Pepijn is net wie de res van ut jeugtrio auk 16 jaor. Hae is woeënachtig in Tegele met zien 2 breurs en zien elders. Auk Pepijn zit op de Flujasschoel in zien examejaor van 5 Havo. Hae is eine groeëte Efteling fanaat. En ein van zien hobby’s is zwumme beej de Reddingsbrigade.
Os nieje jeugtrio helt eur resepsie op vriedaag 7 fibberwarie vanaaf 19.45 oor beej Brasserie de Witte op de Parade in hertje stad.
Zeej gaon os dit jaor veurop onder eure liefspreuk:
Deze vastelaovend gaon weej dreej blage óg veur
En piensele Greunveld, Maasveld en 4-paerdjes in Wiener kleur
Met de muts op de kop en de scepter in de hand
Waat ein schoeën plaetje, kiek ens wie kwant
Op Flujas zien schoeël is uit allemaol begós
Zing met ós meij en vier vastelaovend met ós!
VASTELAOVEND SAME