Vriedaag 20 jannewari is in ein bomvolle Brasserie de Witte tièdes de 1 e edisie van D’n Joeks-Tam-Tam ós nieje jeugtrio oetgerope. Prins Tren I (Geurts) zweijt dit jaor same met zien adjudante Noud (Collin) en Gio (Van de Kamp) de scepter euver ‘t jeugwienrièk.
Prins Tren I is 11 jaor geleje gebaore in ‘t stedje van lol en plezeer. Same met ziene pap Nik, zien mam Ingrid en zien zuske Fleur woeënt hae al ein paar jaor op de Dokter Blumenkampstraot inVenlo. Hae zit op de Schoeël aan de Viever in groep 8. Zien hobby’s zien voetballe, game en met zien vrinde aafspraeke. ’t Meiste is hae te vinde op de voetbalvelde van FCV of op ’t schoeëlplein. De vastelaovend is umal van jóngs aaf aan gelierd. Optóch loupe in de stad, nao de jeugmiddaag van De Wien, recepties bezeuke en heerlik 3 daag vastelaovend viere in ós stedje van lol en plezeer. Binne De Wien is hae zeker genne vraemde. Allebei zien opa’s ware al ens adjudant, eine opa ouk prins en vors en ouk ziene pap móch oeëts de hoeëgste scepter zweie beej de Wien. As jónge jóng ging hae al met eur mei nao De Wien en druimde hae um net als eur oeëts ens prins te zien.
Adjudant Noud is gebaore op 7 september 2011 in Venlo. Wie hae zes waeke ald waas móch hae al mei op de Boerebroelofsfoto beej ‘t gezelschap van de femilie Pollux wao zien mooder Broed waas en ziene pap Bode. Opgegreujd in Venlo-Oeës, woeënt hae sinds veurig jaor op de Herungerstraot. Hae zit in ‘t letste jaor van de basisschoeël op de Talentecampus Venlo. Ziene vreeje tied bestaet hae zoeë vuuel meugelik aan zien allergroeëtste hobby: voetbal. Alleriers neteurlik as actief voetballer beej FCV, wao hae de andere twieë hiere van ‘t trio van kin. Naeve voetbal speult hae gaer op de Xbox of op de Playstation, en is hae ouk nog ens vaste supporter van VVV, wao ik dit jaor ouk ballejóng meug zien. Ouk de vastelaovend zit beej mich in ’t blood. Zoeëwaal van pap as van mam ziene kant zien d’r mich al vuuel veurgegaon in ein dreejspan of in ein andere belangrieke vastelaovesrol. Zien zus Tessa is momenteel dansmerieke beej Jocus Toekóms en zelf haet hae dao ouk nog effe as jeug-Gardis rónd geloupe.
Adjudant Gio haet auk de vastelaoveslaeftièd van 11 jaor. Hae woeënt same mit zien pap, mam en zien zuske Abby op de Straolsewaeg in ‘t Moeraskwaakersrièk in ‘t Ven. Zien Hobby’s zien lol maake mit zien vrinde, Game, en dan veural Fifa speule, teikene en boetespeule. In de zomer geit hae gaer visse. Zien allergrutste Hobby is voetbal, vanaaf zien 4 e laevesjaor is hae gaon voetballe beej FCV. Aafgelaupe April is hae gescout door Fortuna Sittard en in augustus haete de transfer gemak van FCV naor Fortuna Sittard.
Dit alles wuurt óg meigegaeve onder eure prinselikke liefspreuk:
Mit de bal aan de voot en de scepter in de hand
Zette weej dit jaor alles aan de kant
Deze Vastelaovend gaon weej dreej daag lang veurop
En zette weej de tent ens efkes duchtig op de kop
Ouk hebbe zeej ein eige leedje. Luuster ut heejonder,
