Nao ein jaor zónder officiële veurzitter is gister op de algemeine lejevergadering van De Wien Rob van Tankeren door de leje gekaoze as nieje veurzitter.

 

’t Aafgeloupe jaor noom Rob dae taak al tiedelik op zich as vice-veurzitter.

 

Gebaore in Venlo, haet hae ziene jeug groeëtendeils in Blierick doorgebrach, wao hae in aanraking kwaam met vastelaovend wie ziene pap prins woord beej de Wortelepin. Hae haet 25 jaor meigeloupe in de Venlose optóch met vrindeclub ‘De Spooijers’ en is lid gewaore van De Wien in 2016, wie zien schoeënbroor Ed dao prins waas. Hae haet de spónsorkemissie mei niej laeve ingeblaoze en is dao toen ouk de ker gaon trekke as veurzitter van dae kemissie. Maar hae zet zich op allerlei vlakke in veur de Wien; ald pepeer ophaole, of helpe beej de TC, Rob steit altied klaor um de hand oet de mouwe te staeke. In 2019 woord hae zelf prins van De Wien.

 

Rob is getrouwd met Sandra Faessen en zeej hebbe 4 kinder en 3 kleinkinder.

Weej winse Rob perfitsia en vuuel succes en plezeer in zien nieje functie!