Weej hebbe ’t dreuvige berich óntvange van ’t euverlieje van ós Lid van Verdeenste, d’n hier

Wiel van Aarssen

Wiel waas in 1967 ein van de ierste leje van Vastelaovesvereiniging “De Wien” en haet zodoende ein indrukwekkende carrière binne ós vereiniging.

Zoeë waas hae 22 jaor lid van ózze Hoeëge Wieze raod van elf, ein van de oprichters en kertrekkers van ‘t jaorelank  door ós georganiseerde Midzomerfestijn op ‘t Maagdenbergplein en jaorelank lid van ós evenementekemissie. Ouk wis hae lange tied as schriever ós hoesorgaan “de Alde Feep” te veurzeen van ziene inbring.

Waeges ziene inzet veur ós vereiniging woort hae in 2011 dan ouk beneump as Lid van Verdeenste.

Aevel ouk boete Vastelaovesvereiniging “De Wien” waas Wiel eine gaer gezeene vreejwilliger.  Zoeë waas hae ein van de oprichters van handbalvereiniging L’oreal,  en ouk bestuurslid van Dialekvereiniging Veldeke Venlo . Heejveur woord hae in 2017 dan ouk onderscheide tot lid in de Orde van Oranje-Nassau.

Wiel waas op en top einen vereinigingsman dae in al die jaore óntzettend vuuel veur De Wien beteikend haet en is daormei ein veurbeeld veur alle minse die zich inzette binne ós vereiniging.

Weej winse zien vrouw Ria, dochters Yvonne en Moniek en vaerdere femilie en vrinde hiel vuuel sterkte toe.

Bestuur en leje van vastelaovesvereiniging De Wien