Trio 2012:

Prins Frans III Klein

Adjudant Herman Noppert

Adjudant Paul Klein

Vors: Boy Kolman
Veurzitter: Dick Lamboo

De Wien Venlo

Liéfspreuk:

Weej zien as Wienerminse de keuning te riék,
lachend en dansend op ózze eige Vastelaovesmeziék.
Regerend euver ’t moeëjste stökske van de stad,
eine moeëjere druim hebbe weej noeëts gehad.
In de Vastelaovestiéd gaon weej neet slaope en neet nao bed.
Jao, de Wien meug d’r zien..zoeë is ’t maar net!

Waat vluug d’n tiéd... en zéker daen tiéd wie ik gevraog bin gewaore um as 45e Prins van de Wien veurop te meuge gaon. Leef minse, waat is dezen tiéd gevlaoge! En waat hebbe weej as Prinselik Trio genaote vanaaf de kinnismakingsaovend wies ’t vlagstriéke.
 
’t Waas augustus 2011, toen ik beej Paul (miene zoon, later ouk miene Adjudant) nao ’t voetballe aan ’t kiéke waas, wie de veurzitter mich belde en mich vroog um met de Vastelaovend as Prins veurop te wille gaon. Later bleek det ik de letste Hoégheid waas van Dick as veurzitter van De Wien.
 
Wae mien Adje’s zoele waere, wis ik eigelik nog neet persiés, maar det ik Herman zoel vraoge dét stond vas. En maar good ouk, want Herman is waal ‘ne man van de details, want we stónde d’r gelik op! Maar det haet waal waat meujte gekos um de prinsekemissie te euvertuuge, det weej in Venlo oèt zoele kómme en néét in Volendam! En ouk det waas éch de verdeenste van Herman.
 
Wie Herman zien “jao”-waord had gegaeve, wis ik zeker, det ik ouk Paul d’r beej woel hebbe, want ouk ein feesverke huurt d’r beej...! ’t Prinse-logo had ik al min of mier in miene bums zitte. ’t Oétwerke heejvan waas veur Paul - met ziene grafische achtergrónd- dan ouk ein leuke oétdaging.
 
Waat hebbe weej genaote van dae stillen tiéd achter de scherme... met ’t opbouwe van ’t golfkerke waat ik moch lieëne en… beej ‘t oètkómme veur ’t Bestuur, de Raod en ós Iéreleeje op det geheime adres in de Boekenderhof. En dan
's aoves in de Maagdenberg met die golfker nao binne knalle op det PrinseGala!
 
En waat ein geveul asse as nieje Prins d’r baovenop meugs staon en ouk nog midde tösse ál die Wienböl en Wienbölkes! Zalig waas det! Aansloètend volgde ‘ne prachtige Salsa-fièsaovend met ’n heerlik buffet.
 
Daags daonao stónde weej te genete op ’t Vlaghijse met ’n glaas sjampagne. En met ’t zunke baove ós mutse stónde weej as Trio dao waal effe te prónke, huur! Daonao volgde ein ziér gezellige Privé-resepsie. Waat mich waal gepaerdskeuteld haet det op ’t ind van dees resepsie twiëe Ald-Prinse van de Wien same stónde te swinge en waal ózze Prins van ’t iérste Wien-oor Jan Christis met ald Prins Jac Tunnesen. Det goof mich ein éch kiepevelgeveul.
 
En in dae dao opvolgende tiéd o.a. alle kemissies van de Wien opzeuke. Ouk det goof ‘n erg dankbaar geveul, want dan huurse ouk ens nog ens duudelik waat dees minse al neet allemaol organisere en regele veur de ganse Vastelaovend van en veur de Wien. Ik heb dök gedach: “Minse, geej ziet gold waerd veur ós vereiniging!”
 
Jao, en dan bisse as vereiniging en netuurlik ouk as Trio dök aan ’t lot euvergeleverd en dan bedoel ik o.a. heejmei, det weej as letste Trio in ós kerkske van St. Joep ós Vastelaovesmis hebbe meuge viere. Heb boète waal ‘ne kier mótte slikke wie ózzen bisschop Wiertz de sleutel van ós kerkske op zóndaag 1 juli 2012 veur de letste kier umdreide… Heej is toch waal ein stökske tradisie met weggevalle. Zoeë ouk met de gekleurde vaere op de prinsemuts, wao miene Hoégheid Leon II in 2005 mei is begós en det ik dees tradisie noow moch aafsloète.
 
Waat weej zeker mótte bliéve koestere, zien netuurlik ós eige Wienleedjes. Want wao-se as Wienvereiniging ouk binnekumps, huurse toch geliék de toeëne van “As ik dich zeen” en netuurlik ózze eige Wienbol-lek-lek-lek…!
 
Al met al, leef minse, waat hebbe weej ein prachtige vereiniging… ein vereiniging met oètstraoling!
As weej nao de resepsies ginge en weej kwame as Trio van de buun aaf dan stond d’r ónder aan de trap waal ein Wienbestuur en eine Wienraod van Elf, die zich zeker meuge laote zeen!
 
Ós res nog ’t Aaftraeje met joeks, maar ik bin d’r vas van euvertuug, det ouk dét ein geweldige heppening geit waere!
 
Leef Wienminse, geej allemaol bedank veur deze ónvergaetelikken tiéd. Merci!
 
Met Wiengroete van ógge Prins Frans III


<<< gank truuk nao de trio's van alle jaore


De Wien Venlo

De Wien Venlo

De Wien Venlo