Trio 2011:

Prins Jos III Zanders

Adjudant Marcel Jeucken

Adjudant Roland Valize

Vors: Boy Kolman
Veurzitter: Dick Lamboo

De Wien Venlo

Lièfspreuk:

As ik dich zeen.
Geit de vastelaovend beginne
Dan kriège weej ’t kald en werm van binne
4 x 11 zien hièl waat jaore
Want weej zien veur de vastelaovend gebaore
Maak daorum vuuël joeks, jen en plezeer
Want det zeen weej dreej zoeë gaer Vastelaovend same…

Op dónderdaag 2 september geit ’s aoves laat de tillefoon. Net gedouch nao eine lange slopende daag werke. Ik dach nog “krièg ik noow gaar gen rös vandaag!” Ózze vors aan de tillefoon, zoog ik op de mobiele. Vraemp vond ik det neet, want hae belt mich waal dökker euver raodszake. Maar genne Boy aan de tillefoon. Ózze veurzitter Dick melde zich namelik aan de andere kant. Waat mót dae noow met de tillefoon van Boy, dach ik nog. Daag Jos, zei hae en begós waat de praevele euver ein vergadering die zeej vanaovend belag hadde euver de take en verantwoordelikhede van de Chef de Protocol veur ’t kómmende vastelaovessezoen. Ik waas 2 maond geleeje namelik gevraog um 2e Chef te waere. Ik dach nog: “waat eine kwats um mich daor euver te belle.” Enfin, nao ’t verhaol aangehuurd te hebbe, kwaam dan toch ’t hoeëge waord d’r oèt: “Wils dich ózze nieje Hoeëgheid waere in ’t jubileumjaor van de Wien. Ik hoofde daor neet lang euver na te dinke en zag metein “jao, det wil ik.” Ik had ’t daor al ens dökker euver gehad met mien vruike Corina en det vond ’t ouk good. Dick vraog mich nog of ik neet langer bedinktièd nuuëdig had? Nae det waas neet nuuëdig, zei ik um. De wuurs tenslotte toch maar eine kier gevraog, dach ik nog. Ik weit ouk al wae ik naeve mich wil hebbe staon, zag ik taege Dick en vraog of of hae det al woel weite. Netuurlik woel ózze veurzitter det gaer huure. Ik zag um nog “ik weit neet of ózze vors noow bliej met mich is, maar ik heb gaer Marcel Jeucken en Roland Valize as mien adjudante.” Nao ein paar daag belde Dick mich truuk um te vertelle det d’r “witte rouk” waas. Netuurlik had ik de letste daag al euver vuuël zake nao gedach, maar in groeëte liène wis ik waal waat mich te wachte stond. Daonao de kinnismaakingsaovend wao al vuuël gelache en gedóld waort. Vanaaf det moment is ózze vastelaovend begós.

Dan mót d’r netuurlik van alles gedaon en geregeld waere en det ging allemaol van ein leije daekske. Weej zien waal lang bezig gewaes um te bedinke op welke wies weej oèt meuste kómme. Det is neet zoè mekkelik asse alle dreej oèt de Raod van Elf kumps. Umdet dit ein jubileumjaor waas hebbe weej dreej jubileumprinse Hay I Maas, Lei I van Went en Lei II Knoops gevraog um in plaats van ós oèt te kómme. Gelökkig veur ós stumde zeej daormei in. Ein ander ‘probleem’ waas de Chef de Protocol. Umdet de 1e en 2e Chef de Protocol in ’t trio zoote, waas ’t de beurt aan de 3e Chef de Protocol. Dae had daor netuurlik gaar neet op geraekend. Hae waas dan ouk zièr verras. Gelökkig haet hae alles good opgevange.

Waat hebbe weej geweldig moeije momente gehad. Hoeëgtepunte ware toch waal ’t oètkómme op ’t Prinsegala, de groeëte resepsie waor huuël vuuël femilieleeje en vrinde aanwezig ware, de Prónkzitting en netuurlik de Blièrickse daag beej mich thoès. Ik had noeijts gedach det die allemaol beej mich in hoes zoele passe. Ózze buurt vónd ‘t ouk erg gezellig met Joekskapel Span Herres, die ein geweldig stökske meziek weg gaof.

Maar waat op mich de meiste indrök haet gemak, zien de zittingsaovende beej de Vorstenheuvel en de Seniore. Waat is ’t geweldig um die minse te zeen geneete van ’t programma det wuuërd aangebooije. En genaote hebbe weej ouk van alle evenemente waor ouk ’t jeugtrio Prins Joey I Beerkens en zien adjudante Dimphy Leijssen en Laura Storm aanwezig ware. Same met ’t jeugtrio, ózze vruikes Corina, Monique en Miriam en ózze blaage Selina, Loes, Pim en Kai hebbe weej jaor gehad um noeijts te vergaete! ’t Waas altièd huuël gezellig en gereageld huuël laat in ós residensie; waor weej ontzettend vuuël gelache en lol gehad hebbe same.

Ik vond ’t geweldig um prins beej de Wien te zien in ’t jubileumjaor 2011.

Ald Prins Jos III



<<< gank truuk nao de trio's van alle jaore


De Wien Venlo

De Wien Venlo

De Wien Venlo