Trio 2010:

Prins Maan I Verkoeyen

Adjudant Nick Gaspersz

Adjudant Joep Sieben

Vors: Boy Kolman
Veurzitter: Dick Lamboo

De Wien Venlo

Lièfspreuk:

JAO HALLOOO
Heej, veur jónk en ald, groeët en klein 
Staon we dan met zien dreeje beejein  
Weej make de vastelaovend met óg waor  
En staon aldaag veur óg klaor  
Heejvan krieg geej genne spièt 
Want ós motto is “de moeëjsten tièd”
Vastelaovend same!
 
Zit ik gezellig met Monique te aete beej De Alde Merret, geit um 18.10 oor d'n tillefoon. Hoi Maan met Dick, kump ’t gelaege det ik dich bel? Jao, uhhh, zit eigelik net te aete. Oh gen probleem zaet Dick, bel ik dich later op d’n aovend effe truuk.
 
Zoeë fijn, ik kièk Monique aan en het zoeë van… wao ging det euver? Ik hièl veurzichtig, as de veurzitter dich belt in dezen tièd heb ik van mien TC koempels begrepe kin det maar euver ein dink gaon!!!!! Monique ging gelièk oèt zienen bol, ik waas perplex en ik waas toch dae man dae altièd zag, det ik det neet zoel doon!
 
Dick belt mich um 20.00 oor truuk, óndertösse zitte weej op de fiets nao ‘nne verjäördaag in Blierick en hae begint euver de aafspraoke met de Maaspaort veur de resepsie. Toen ik dach det we klaor ware met dit tillefoontje, vruug Dick mich of ik de Hoeëgheid van 2010 wil waere, ik veel zoeëwat van de fiets. Van de verjäördaag heb ik neet zoeëvuuël mier meigekrege.
 
Vanaaf d’n tièd ging alles in ein stroumversnelling, nao alles te hebbe aafgewaoge en Joep en Nik as adjudante te hebbe gekaoze, kwaam beej ’t veurstelle al snel oèt det weej aan mekaar gewaog ware en met zien zesse op ein lièn zoote um d’r ein schitterende tièd van te make.
De veurbereidinge en gezellige aovende ware begós en de maedjes hebbe in dezen tièd vuuël werk gedaon.
 
’t Woort mich al snel duudelik det ik ’n stap euver had geslage en ièrs adjudant had mótte waere. Det is mich door de Ald Adjudante neet in dank aafgenaome. Gelökkig waar ik neet de ièrste dae det euverkwaam.
 
De evenemente zoeëas ‘t oètkómme, de Vastelaovesmis, d’n Intoch, de Groeëte Resepsie, de groeëte Prónkzitting en de Blièricksen Daag met joekskepél Span Herres ware geweldige belaevenisse en einmalige ervaringe die ze neet snel vergits. Ein van de moeëjste momente waas waal ’t bezeuk op d’n Bliericksen Daag beej de elders van Nik (ziene pap waas erg krank) wao weej met ’t hièle gezelschap veur de deur stónde en ik um meugde toespraeke, dit waas hièl aangrièpend.
 
Ik mót waal kwièt det ‘t ein heftige periode waas en veural de samewerking met de chef effe winne waas. Veur Marcel waas ’t zien ièrste sezoen det hae as ièrste chef moos werke maar det is um good aafgegaon. Ik kin gerös stelle det weej ein grandioos sezoen hebbe
gehad en weej ouk. zoeë wie aangegaeve in de proklamasie, erg betrokke ware beej ’t jeugtrio en weej beej ’t vlagstrièke menig träönke hebbe gelaote.
 
Gruuèts bin ik det ik Hoeëgheid heb meuge zien beej De Wien.

Ald Prins Maan I 


<<< gank truuk nao de trio's van alle jaore


De Wien Venlo

De Wien Venlo

De Wien Venlo