Trio 2009:

Prins Marc I Houwen

Adjudant Nik Geurts

Adjudant Chris Munten

Vors: Boy Kolman
Veurzitter: Dick Lamboo

De Wien Venlo

Lièfspreuk:

Dans en meziék is ós lös en ós laeve
Eine schoeëne vastelaovend, veur jóngk en ald, is ós straeve
Daorum zien weej ech neet veur ein gaat te vange
En bekruup’s met dees daag en groeët verlange
Op Wienertoeëne wuurt deze vastelaovend zeker genne sleur
Want ein dink is zeker: “Weej gaon d’r veur”.
 
Det is met gen pen te beschriève waat d’r allemaol met dich gebeurt, as de veurzitter belt met de vraog, of ze de nieje Hoeëgheid van de Wien wils waere.
De letste jaore woort ik steeds dökker geneump en ging d’r zelfs al ein bietje raekening mei halde,  maar as ‘t dan toch intelik zoeë wièd is, brik dich ‘t zweit oèt en scheete dich doeëzend en ein dinger door de kop. Det waas dan ouk de raeje det ik taege ózze veurzitter Dick zei det ik waal ein paar daag bedinktièd nuuëdig had. 
 
Wie ik nao ein paar daag intelik aan ’t idee ging winne, alles op ein rieke had gezatte en Petra mich had gezag det ik ech genne twieëde kier gevraog zoel waere, waas ik d’r hielemaol oèt, ik waer de nieje Hoeëgheid van 2009. Vanaaf det moment had ik de knoep umgezatte en ein dingk wis ik zeker, ik woeël ein paar jónge enthousiaste Adjudante, die same met mich die vastelaovesker op ein unieke en ludieke wièze, zoele gaon trekke. 
 
Beej de kinnismakingsaovend woort al snel duudelik det Nik en Chris op ‘t zelfde spoor zote en det ik de juuste keus had gemak. Ouk ós maedjes Petra en Ingrid hadde d’r óntzettend vuuël zin in en ginge dan ouk wie einen trein. Jaomer genóg had Chris op det moment nog gen vaste vrindin. Nao de ièrste twieë werkvergaderinge en ’t oètzeuke van de witte mutse beej Geer v/d Veer woort ’t steeds duùdelikker det weej verrassend en verniejend veur d’n daag woele kómme. D’r woorte planne gemak veur ein leedje en zelfs veur ein film.
Um det allemaol veur mekaar te kriege hebbe weej de hölp ingeschakeld van Marc Peters, zoon van Frans 1.
 
‘t Oètkomme op ‘t Prinse Gala waas einen druim, want alles leep wie weej gehaop hadde. De film woort hiel aandachtig bekeke en de verrassing waas dan ouk groeët wie weej in eine kièr achter ‘t gordièn oèt kwame. Wie weej zingend nao ‘t podium lepe en ós eige leedje  “de vastelaovestrein” geliek aansloog, waas ‘t fees kompleet.
 
Beej ‘t Vlagheise ware Snip en Näörke (Petra en Ingrid) waat aan de late kant waodoor Vors Wienius (vader van Näörke) ‘t ein bietje werm kreeg umdet hae woel beginne. Ondanks de raegen waas ‘t good drök veur de Maagdenberg en ouk de privé resepsie woort good bezóch.  
 
‘t Jeugwiekend waas super en met name de klik met ‘t Jeugtrio deej ós good. Ouk zoog ik det de Jeugkemissie eur stinkende bes deej en mien take vlekkeloos euver genaome woorte.
 
Beej de H.Mis, de Intoch en de Groeëte resepsie waas ik zièr verheug met de aanwezigheid van de Karrewaans Garde. Ouk ‘t bezeuk van ózze Börgervader d’n  hièr Bruls waas erg verrassend. De Resepsie waas zoeë drök det weej nog genne tièd hadde veur te aete.
 
De Prónkzitting zal de beuk in gaon as ein van de beste en det kwaam neet allein door adjudant Nik dae zien leeftallig Ingrid ten huwelik vroog maar det loog ouk aan de geweldige artieste die d’r veur zörgde det ‘t niveau erg hoeëg waas en de bühne geregeld laeg, umdet d’r polonaise door de zaal gemak woort.
 
De mezièk stónd in ós logo en leep as eine roeëje draod door ózze ganse vastelaovestièd haer. Minnig resepsie, werkbezeukkemissie, verjäördaag of zoeëmaar ein bezeuk, hebbe weej haopelik waat extra’s kinne gaeve door ós leedje “de Vastelaovestrein” ten gehuure te bringe. Ouk hebbe weej geprobeerd um aaf en toe waat verniejend bezig te zien maar det veel neet idderskièr in gooje eerd.
Weej hebbe same met ós maedjes eine geweldige tièd gehad en dao woele weej idderein dae det meugelik haet gemak nog ens hertelik veur bedanke. 
 
Kantteikening redaksie:
Marc is in 1995 lid van de Wien gewaore. In 2000 is Marc lid gewaore van de Jeugkemissie en vanaaf 2004 haet hae ’t veurzitterschap van dees kemissie euver genaome van Jos Alberts. Vanaaf  2001 schrièf en zingk Marc al leedjes veur de Wien. Dit schriève en zinge is neet ónverdeenstelik gebleve, want met 3 nummer 1-hits, mièrdere andere noteringe en zelfs ein halve finale beej ’t LVK meug Marc neet klage.
Dees staot van deens, haet Marc netuurlik ouk te danke aan zien zangkoempels Leon Helgers en vanaaf 2008 Ed Sonnemans. Weej zien taegeswaordig ouk waal bekind ónder ózze artiestenaam “de Wientoppers”. 


<<< gank truuk nao de trio's van alle jaore


De Wien Venlo

De Wien Venlo

De Wien Venlo