Trio 2007:

Prins Rien I van Heukelom

Adjudant Menno Timmermans

Adjudant Gerard Vonk

Vors: Boy Kolman
Veurzitter: Arno Bos

De Wien Venlo

Mien leef ónderdane, 

As ik deze teks schrièf is mien prinsschap alweer 3 jaor geleeje. Lièk waal vuuël langer geleje trouwes.

Op dit plaetske wil ik ièrs efkes iets euver de persoeën Rien en mien Wiengeschiedenis vertelle veur ‘t naogeslag.

Ik bin op 24 juli 1964 in de Carolus Borromeusstraot in Venlo gebaore. Die straot besteit al jaore neet mièr maar loog tösse de Veerpaerdjes en de Kaldekerkerwaeg. Ik bin dus net genne echte gebaortige Wienbol. Daonao heb ik in de van Vogelsanckstraot en in de Posflat gewoeënd. Det is allemaol (net) neet in de Wien. Via ’t Greunveld, Greunstraot Noord en weer ’t Greunveld bin ik inmiddels (op ’t moment van schriève) in Holt-Blièrick terech gekómme. Of ik dao op ’t moment det geej dit laes nog woeën weit ik neet..

Ik bin in 1994 lid gewaore van de Wien. Verschillende van mien vrinde ware al lid van de Wien en die vónde ’t dao kwant. Daags nao mien aanmelding as lid van de Wien belde Guus Theewen mich of ik beej de TC kwaam. Det leek mich waal wat. Ein diek jaor later, in 1995, woort ik gebeld door de toenmalige veurzitter Lei van Went of ik adjudant woeël waere in ’t Trio 1996: Mart I, Adjudante Richard en Rien. ’t Jaor dao op, in 1997, bin ik beej de Raod van 11 gekómme. Det heb ik gedaon (met ein korte ónderbraeking) tot en met 2003. Ik bin dus twieë kièr lid van de Road van 11 gewaes

In 2000 bin ik ouk lid gewaore van ’t bestuur. Ièrs as twieëde penningfoeks en vanaaf 2004 as viceveurzitter. En in 2007 ben ik de Wien veurgegaon als Hoeëgheid van de Wien same met mien adjudante Menno (Timmermans) en Gerard (Vonk). En op dit moment bin ik nog steeds de viceveurzitter van de vereiniging. 

‘t Is gebroekelik um op deze plaats te vertelle det mien Trio ‘t beste waas wat de Wien oeits gehad haet. En det waas ‘t ouk. Veur ós dreej in idder geval waal. Idder trio vind zichzelf namelik ‘t beste en det mót ouk veural zoeë bliève. Netuurlik  waas ‘t veur ós einen supertièd wao ik twieë vrinde aan euvergehalde heb. Ik wil deze ruumte ouk effe gebroeke um ens truuk te kièke nao mienen tièd beej de Wien (en ein biètje veuroèt…). 

Sinds 1994 is d’r toch waal ‘t ein en ‘t ander veranderd binne de vereiniging. Det is neet raar want det is de waereld um ós haer ouk. Sómmige zake zien d’r baeter op gewaore, andere zien ‘t zelfde en andere zien d’r neet baeter op gewaore. Tenminste zoeë ervaar ik det en det wil neet zegge det det ouk veur andere geldt.

Asse zoeë lang al mei dreis dan hebse vuuël minse in vuuël verschillende funksies binne de vereiniging zeen gaon en kómme. En ouk al vuuël dinger meigemak. Leuke dinger maar ouk minder leuke. En zeker as bestuurslid. Wie ik begós beej de vereiniging ware vuuël ‘legendarische’ Wienminse van ‘t ièrste oor al gestop met de aktieve funksies. De mós dich dan alle zake binne de vereiniging eige gaon make en probere dao dienen eigen drei aan te gaeve. Det heb ik altièd geprobeerd en zal ik ouk blieve doon. 

Al met al haop ik det ik beej ‘t 88-jeurig jubileum van de Wien same met nog einige ald prinse in ein hukske kin zitte um te murmele euver dae goojen alden tièd. En dan nog te meuge huure van de jeug die dan zaet: zuusse die alde dao zitte? Die hebbe d’n 1eprins van de Wien nog gekind...



<<< gank truuk nao de trio's van alle jaore


De Wien Venlo

De Wien Venlo

De Wien Venlo