Trio 2006:

Prins Boy I Kolman

Adjudant Jos Zanders

Adjudant Marcel Elbers

Vors: Ed Sonnemans
Veurzitter: Arno Bos

De Wien Venlo

Lièfspreuk:

Det weej same oèt ’t gooije holt zien gesneeje,
Same met òg leef Wienleeje,
Daorum viere weej vastelaovend zoeëas ’t huurt
Met óg in ós Wienerbuurt
Diek of dun, jónk of ald det kin niks gaeve
Want same zulle weej eine schoeëne vastelaovend belaeve...
 
’T waas 24 augustus 2005 det ik op vakansie waas in Frankrièk in de buurt van Albertville met mien vruike Petra same met ós Ien (lid van de AZ) en zien menke Pieter (lid van de poskamer) beej breurs van Pieter. Ein klein detail is det zeej de elders zien van miene adjudant Jos.
 
Ónder ’t aete -’t waas al 20.30 oor gewaes want in Frankrièk zien ze döks wat later met ‘t aovendaete- ging de tillefoon en ik zoog det ’t nummer van Wilfried waas. Umdet ik te laat waas met aanneme waas de verbinding al snel weer verbraoke.  Ik vroog mich aaf waorum Wilfried mich nuuëdig had boéte ’t vastelaoves seizoen en zoeë ouk Petra en ós Ien want zeej ware, wie vrouwluuj det dökker zien, niejsgierig.
 
 Efkes later geit dae'n tillefoon weer en noow waas ik wat sneller maar huurde genne Wilfried aan de andere kant van de lien terwiel det toch zien nummer waas.  Ik leep nao boete met oétzich op de Mont Blanc zoeëdet ik baeter kós huure wat d’r gezag woort . Aan de andere kant van de lien huurde ik de stum van Arno Bos. Ónderwiel hae ein of ander verhaol euver ein vergadering aafstook, waat gaar neet tot mich door dróng, kriebelde ’t mich in d'n boeëk. 
 
Ónder ’t genete van det schitterend oétzich dóch ik, zoeël ’t werkelijk zoeë zien det hae veur waat anders belde?  Want geej mót weite: de tiéd waas d’r rièp veur. En jao huur, dao kwaam de vraog: “De prinsekemissie haet gemeind dich te vraoge um kómmend seizoen as hoeëgheid veur te gaon in de Wien.”
 
Ik meus d’r maar ens euver naodinke en ’t d’r same met Petra euver hebbe. “Arno” zei ik “de wets heej hoof ik neet lang euver nao te dinke” maar vaerder kwaam ik neet want de tillefoonkaart waas door dit gesprek netuurlik laeg getrokke.  Um ein langk verhaol kort te make,  nao mien vakansie heb ik Arno metein gebeld en ’t gesprek aafgemak met de meidedeiling det d’r witte rouk waas. Mien vruike Petra stónd metein achter mich en same beslote weej det Jos Zanders en Marcel Elbers mien adjudante zoeële waere.
“Waat ein gelök” waas ’t motto, maar ouk waat ein gelök det ik al ens adjudant waas gewaes beej Wilfried, want daovan is mich vuuël beej gebleve wat mich in mien regeringsjaor good van pas is gekómme.
 
‘T oétkómme op 21 jannewari waas geweldig en de TC jónge hadde weer óntzettend eur bes gedaon um d’r ein geweldige zaal van te make in ’t venitiaans. Ein privérecepsie óntzettend drök, maar det kriesse asse groëte femilies haes. ’t Oétrope van ’t jeugtrio,  Prinses Martine en eur adjudante Loes en Roxanne,  ièrs  in ‘t geheim met klein gevolg en de jeugkemissie en later op de jeugdisco zien momente um neet te vergaete.
 
Ós eige groeëte Wienrecepsie in de Maaspaort (jaomer genóg waar ik de letste) um van te zoebele en in ein woord geweldig. De ganse bühn vol met allein maar femilie ’t kós neet op.  De groeëte prónkzitting in de Maaspaort waobeej de adreline door dien lichaam struimp asse allein met dien adjudante van achter door de middepaad nao veure löps en geneets van idder moment.
 
De mós ’t mei hebbe gemak um d’r euver mei te kinne praote. Tösse door diverse recepsies van ós zustervereiniginge en Jocus bezóg en ouk de bewoeëners van de Vorsteheuvel en ós eige seniore in ’t jeughoés op de Maagdenberg eine schoeëne aovend bezörg.
En neet te vergaete de verschillende verjeurdage waovan die van mien eige döchter Ingrid en Susan die 3 fibberwari jäörig zien d’r eine waas. Vanaaf 1999 toen ik adjudant waas, kump ‘t trio steinvas elk jaor efkes "act de presence" gaeve.
 
En zoë ware d’r nog vuuël miér ónvergaetelikke momente waobeej weej ós vruikes Corina, Jacqueline en mien Petra ech neet vergaete want die steuntjes in de rök kinse gaar neet misse in zónne tiéd.
 
Gruuëts det ik bin det ik oëits hoeëgheid van de Wien heb meuge zien.


<<< gank truuk nao de trio's van alle jaore


De Wien Venlo

De Wien Venlo

De Wien Venlo

De Wien Venlo

De Wien Venlo

De Wien Venlo

De Wien Venlo