Trio 2005:

Prins Leon II Bastiaans

Adjudant Ruud Engels

Adjudant Frans Klein

Vors: Ed Sonnemans
Veurzitter: Arno Bos

De Wien Venlo

Lièfspreuk:  

Balancerend op ´t rendje van ´t vastelaovesprotocol, belaeve weej met óg same, hiel vuuël lol.
Vastelaovesblood struimp door ós aore, det hebbe weej  meigekrege toen weej zien gebaore.
Jonk en ald: "zet ´t Wienerrièk op de kop!" Same staon weej d´r gekleurd op.
 
Enne druim dae ik eigelik neet mièr had verwach, is toch oètgekómme. Waal maar waer eine van de zoeëvuuël druime. Maar gelökkig bin ik nog neet doeëd (tenminste op ’t moment det ik dit schrief) en wae wet, welke nog mièr oèt zulle gaon kómme.
 
Umdet ik zoeëvuuël druim, heb ik hièl vuuël ideeje welke ik meistal ouk waal weit te realisere. Vandao det ik gevraog bin gewaore um prins te waere  in ’t jaor 2005. Ein jaor waat eigelik iets te laat kwaam.
 
Umdet ik mien ideeje neet mièr kwièt kós binne de vereiniging, heb ik links en rechts waat minse taege de pienlikke puuët aangestamp en det is dan ouk de raeje waorum ik d’r neet mièr op geraekend had det ik oeits nog prins van de Wien zoeël waere. Messchiens had ’t motto van det jaor (weej staon d’r gekleurd op) d’r waal ein beteikenis in.
 
Maar asse truuk kumps van 'ne verjäördaag van dien nichje en de veurzitter belt dich dan met DE vraog, onderwièl dien maedje ónder de douche steit, dan wuurs ze toch klein, bleik en minder spraakzaam.
 
Wie Nanc ónder de douche oètkwaam en ik verslage op ’t witte lake loog, vroog ’t waat d’r aan de hand waas. Ik waas net zoeë wit as ’t lake! Wie ik ’t um heb verteld, is ’t d’r maar naeve gaon ligge en goof mich ’t advies um jao te zegge. Det is toch diene wins, de wins van iddere mins, prins, prins, prins! Frans Pollux had volges mich enne camera op ós slaopkamer gemonteerd, want hae makde d’r in det jaor ein leed van.
 
Ik zei det ik d’r effe eine nach euver woel slaope, terwièl ik ièrs altièd de meining had metein jao te zegge. Noow is d’r van dae nach slaope neet vuuël terech gekómme, maar ein kleine nege eurkes later heb ik de veurzitter truuk gebeld en mien Adjes kinbaar gemak. Twieë jónges vanoèt de buurt beej de vereiniging betrokke, det waas mien doelstelling.
 
Frans Klein had zien maedje al jaore in de jeugkemissie zitte en had mich al ens ièrder in de Yellow gevraog of hae miene adjudant zoel meuge zien as ’t zoeëwièd waas. Ik heb um det belaof en belofte mak schöld. Echter had ik det waal vuuël mièr minse belaof, maar umdet ik toch ech de wins had det ze oèt de buurt meuste kómme, mót ik die andere schöldig blieve. Ruud Engels woeënt beej ós in de straot en kump idder jaor met zien femillie vastelaovend viere in de Maagdenberg. Vrinde waorte gebaore.
 
Weej hadde ein te gekke veurbereiding van waal 18 waeke, maar jaomer genóg maar 4 waeke veur de oètveuring. Achteraaf maar good ouk, want weej hebbe slechs vièf chef’s verslete. Loog det aan ós??? Ik kin óg waal zegge det ’t ein geweldig moment is asse nao al dae'n tièd van leuges en zwiege in eine auto de Maagdenberg ingereeje wuurs as Trio van de Wien.
 
Weej hadde dan waal in ózze lièfspreuk staon, det weej balanceerde op ’t rendje van ’t vastelaovesprotocol en wie beej iddere balans, geisse sóms nao links en soms nao rechts. Toch bleef alles binne de perke, want ik bin eigelik eine enorme veurstander van protocol. Anders wuurt ’t maar ein zootje. 
 
Weej hebbe d’r waal vuuël plezeer met belaef. Recepsies bezeuke zien ouk leuk, maar die mak idder trio mei. Vandao det weej op zeuk zien gewaes nao verniejende dinger, zoeëas beejveurbeeld de deilname aan ’t prinsetreffe in Remund. Weej hadde eine twieëde lièfspreuk en wie ik dae ‘per óngelök’ beej ’t veurstelle aan de raod veurloos, dach ik det d’r ein paar ein hertverzakking krege. Daezelfde meus ik beej de Hièrezitting opzegge op verzeuk van de zaal. Dae waas namelik waat minder netjes, maar det mót kinne met manne ónder elkaar. Noow kin ik dit waal schriève en weit det geej dink waat dao noow zoeë leuk aan waas. Maar dao geit ’t juus um. Persoeënlikke momente, want de wuurs maar eine kièr prins, toch? 
 
Kantteikening redaksie:
 
Lid van de joekskemissie
Oprichter en veurzitter van de zelfstandige jeugkemmissie, van de sponsorkemissie, stichting Wienevenementen en van ’t Midzomerfestijn.
Zanger van verschillende bekroeënde leedjes (o.a. 2x nummer ein)
Veurzitter van de jubileumkemissie 3x11
Oprichter van de ald pepeer aktiviteite
Kertrekker van eine nieje geluudsdrager te weite: cedee
Spraekstalmeister van de groeëte recepsies in de Maaspaort
Waas in ’t bestuur secretaris en  viceveurzitter van de vereiniging( 1992-…)


<<< gank truuk nao de trio's van alle jaore


De Wien Venlo

De Wien Venlo

De Wien Venlo