Trio 2000:

Prins Lei II Knoops

Adjudant Leon Helgers

Adjudant Jos Alberts

Vors: Han Koelen
Veurzitter: Arno Bos†

De Wien Venlo
Lièfspreuk:
 
Door de jaore haer waas De Wien op zien bes
Die ervaring hebbe weej in de tes
Daorum gaon dees vastelaovesgekke
Beej De Wien de jubileumker trekke
Verkleid as kloon of dwerg
Vastelaovend viere duis ze op de Maagdenberg

Op 9-9-1999 trouwde d'r in Nederland doèzende minse, umdet deze datum zoeë spesjaal en uniek waas. Maar veur mich waas dit ouk ein zièr spesjale datum. Want op dezen daag belde de veurzitter mich op en vroog mich of ik Prins van De Wien woel waere. Ik kreeg inkele daag bedinktièd. Maar dees had ik neet nuuëdig, want ik vond 't ein zièr groeëte ièr um Prins van De Wien te meuge waere. De adjudante ware al snel gevonde en 't jubileumtrio waas ein feit. Wie weej aan ein veurgesteld woorte, woort medein gerope: "Oh, det had ik waal gedach!" De veurbereidinge kóste beginne. De stille tièd waas smeis waal meuilik, maar waal erg leuk.

Op 29 jannewari 2000 woorte weej 's middaags opgehaold door Wilfried Siebert (Chef du Protocol) en weej reje nao ein zoeëgenaamde geheime plaats, det waas Aetkefee De Straol, 100 maeter van ós vandaan, um d'n hook. In de keuke meuste weej ós verstoppe en krege aaf en toe ein pilske gebrach. Weej woorte good ingepak en ein veur ein aan de Raod, Bestuur en ièreleje veurgesteld. D'r ware vuuël minse die mich getip hadde, toch leuk!. De spanning waas d'r vanaaf. Nao ein gezellig samezien woorte weej nao hoès gebrach en kóste weej ós op gaon make veur de Prinsebal. 's Aoves um 20.11 oor stónde weej verkleid in de zaal. Um nege oor kwaam de Raod met de Vors binne en 't spel kós beginne. Vanwaeges 't millennium woorte weej via "handy's" gebeld. Weej hadde ónder de kleier ein tillefoon verstop. Beej de adjudante ging de tillefoon good euver en kóste zeej zoeë oèt de zaal geplök waere. Maar beej mich lökde dit pas d'n derde kièr. Weej woorte geinstalleerd en van alle versiersele veurzeen.

Op ein gegaeve moment woorte ós de scepters weer aafgenaome, en krege weej oèt hand van ózze veurzitter Arno Bos splinternieje scepters, dit vanwaege 't jubileumjaor. Deze schitterende scepters zien oèt holt met de hand gesneje en gemak door Jo Scheffer oèt Velde.

In d'n tössetièd waas de femilie gebeld gewaore en Martin Holla ging mien mooder thoès haole. Wie zeej instapde, vroog zeej aan Martin, wie ik mich neumde, en hae zei: Geej wet toch waal wie ógge zoon hit?" Maar zeej bedoelde Leo of Lei. 't Is nog laat gewaore d'n aovend, maar erg gezellig.

's Zóndaags um 12.00 oor woort de vlag gehese veur de Maagdenberg en ós regeerperiode waas begós. De privé-receptie waas gezellig en weej woorte door vuuël minse gefilliciteerd.

Beej de groeëte receptie in de bómvolle Maaspoort kwaam de Stadtgarde “Oecher Penn”, op bezeuk. Det waas werkelik fantastisch. De bezeuke aan de schoeële, en de gehandicapte waas werkelik hertverwermend. Ik had noëit gedach det ein prins van klatergold zoeëvuuël emoties kós los make. Beej de bejaarde stónd ik met ein bäökende man van 83 jaor in mien erm, tieën minute lang. Vièf waeke lang, op twieë daag nao, zien weej ónderwaeg gewaes, det waas d’n tièd van mien laeve.

Van alle evenemente die weej det jaor hebbe meigemak hebbe weej genaote en óntzettend vuuël plezeer gehad.

Met mien twieë adjudante Jos en Leon, same 't Jubileum- en Millenniumtrio, hebben weej d'r veur gezörgd det 't jaor 2000 ónvergaetelik is gewaore en det dit jaor de geschiedenis in is gegaon als ein jubelend jaor!

Weej bedanke idderein, met name de Prinsekemissie, veur alles waat zeej veur ós hebbe gedaon! En ouk idderein dae op welk wiëze dan ouk haet beejgedrage aan dit grandioos jubileumjaor.


Kantteikening redaksie:

Lei is in 1985 lid van de Wien gewaore. In 1990 woort Lei same met Wilko van Spankeren lid van de P&P. De P&P bestond toen nog allein oèt dames. Ans Seelen waas op det moment veurzitster. Hae noom in 1997 wies 2012 ‘t veurzitterschap van dees kemissie euver van Anneke Vullings. Door Lei ziene grafische achtergrónd, veranderde de Alde Feep in ein moeëj bookwerk. Teks schriève en 2de fotograaf speule veur de Alde Feep det is zien hobby. Hae waas ouk de óntwerper en mede-samesteller van ‘t 33-jäörige Jubileumbook van de Wien. In 2000 richte Lei same met Leon Helgers en Leon Bastiaans de Sponsorkemissie op, dao is hae tot 2016, met ein ónderbraeking van ein jaor, veurzitter van gewaes. Lei is ouk jaore lang sponsor gewaes van de Wien.



<<< gank truuk nao de trio's van alle jaore


De Wien Venlo

De Wien Venlo

De Wien Venlo

De Wien Venlo

De Wien Venlo

De Wien Venlo

De Wien Venlo

De Wien Venlo

De Wien Venlo