Trio 1999:

Prins Wilfried I Siebert

Adjudant Boy Kolman

Adjudant Ger Bakker

Vors: Han Koelen
Veurzitter: Arno Bos†

De Wien Venlo
Lièfspreuk:
 
Waat weej ós winse in de Wien-cóntreije
Is det de vastelaovesstorm flink geit weije
As óg det waat liek, houw neet van wiek,
Maar laot dan die Wien-meule dreije…
 
Waat kin eine mins zich mièr winse, dan oeits ens Prins van de Wien te waere? Dees kans woort mich gebaoje op 7 september 1998 en heb die dan ouk met 2 hand gegrepe. Netuurlik winsde ik mich 2 kwante adjudante en wie mien keus op Boy en Ger veel, wis ik det det good zoot. Weej zoele d’r ens flink taegenaan gaon en det hebbe weej met ós statiefoto duudelik wille make.
 
Umdet ik al ein gas jaor “Chef du protocol“ waas, weit ik waat ‘ne Prins steit te wachte…..maar asse zelf Prins wuurs, zien de veurbereidende werkvergaderinge extra intensief: de mós namelik döbbel dinke: as Prins, maar ouk as Chef….
 
Dao kwaam nog beej, det de –stiekumme tièd-  erg kort waas, de Vastelaovend veel vruug det jaor en Kitty en ik hadde ouk nog ein vakantie geplend…….’t Oefene van ózze lièfspreuk kosde mich dan ouk aardig waat zweitdröppelkes (of kwaam det van die Canarische zón?)
 
Pech hadde weej ouk, wie bleek det de beschermende lak de verf van de waopes oplosde….hiel vuuël gelök hadde weej wie mienen buurman en goojen vrind Frans ( dae ós later det jaor zièr spiètig is óntvalle) d’r veur gezörg haet det daags veur ’t prinsebal alles op tièd klaor waas…
 
As Chef du Protocol hald ik mich ’t leefs op de achtergrónd, maar um as Prins van de Wien “letterlik” in de schienwerpers te staon, dao wuurs se pas ech werm van. ‘t Oètkómme waas dan ouk kort gezag “flitsend”.
 
De waeke daonao ginge wie einen trein. Ós privé-residensie aan de Huuskesstraot woort umgebouwd tot permanente kroeg, wao de “borrel-eurkes” oore woorte en waas hèt adres veur minse met maagpièn (de Mühlentropfen doon wóndere…)
’t Guf dich ein geweldig geveul um as Prins al die vrinde, kranke, jäörige, jubilarisse, bejäörde te meuge bezeuke, de kriegs d’r zoeëvuuël hertelikheid veur truuk, det is ónbeschrieflik…
 
’t Bezeuk det mich persuuënlik ’t meiste is beejgebleve, is toch waal ’t bezeuk aan mien eige mooder. “Mutsch” woort in deze periode nl. 75 jaor! Dao zoele weej ens efkes ein feesje van make. Um eur neet te euverdóndere, zoele weej met ós zesse en klein gevolg eur gaon fillisitere. ’t Klein gevolg woort maar groeëter en groeëter…………Oètintelik ging de ganse Raod mei en waat is noow ein fees zónder mezièk, dus de joekskepèl “Schots en Scheif” meus ouk mei… Met waal 40 man kwame weej dao binne valle….Waat haet zeej genaote. ’t Waas einen aovend um noeits te vergaete!
 
Dit bezeuk haet d’r waarschienlik veur gezörg det weej as Trio “internationale bekindheid” hebbe gekrege, de krante stónde d’r vol van: “Wilfried Siebert, Herscher über die Narrenschar”!
 
Kantteikening redaksie: 
 
Wilfried is in 1983 lid gewaore van de Wien.
In 1984 is hae adjudant gewaes beej Prins Piet I (Beckers).
Vanaaf de oprichting van de evenementekemissie is hae lid van dees kemissie, wao hae ouk jaorelank veurzitter van is gewaes.
Wilfried is al vanaaf 1985 lid van de Raod van Elf . As Chef de Protocol haet hae de nuuëdige jaore de Prinselikke Trio’s accuraat begeleid. In 2009 is hae daomei gestop. 
Ouk als sponsor droog hae zien steinke beej.


<<< gank truuk nao de trio's van alle jaore


De Wien Venlo

De Wien Venlo

De Wien Venlo

De Wien Venlo

De Wien Venlo

De Wien Venlo

De Wien Venlo

De Wien Venlo