Trio 1998:

Prins Jac I Tunnesen

Adjudant Peter Bogdanski

Adjudant Frans Vostermans

Vors: Han Koelen
Veurzitter: Arno Bos

De Wien Venlo

Lièfspreuk:

Vastelaovend in dezen tempel,

dao-op drökke weej ózze stempel,

Weej laote de Wienmotor rónke

en euveral springe dan de vónke,

Bliéf neet staon, maar bliéf bewaege,

’t haet zien veur en ’t haet zien taege,

Greeke kinne weej neet gebroéke,

anders werke weej die nao boète,

Weej kinne gennen tièd en gen oor..

want ós motto is, gank altiéd door…
 
 
As 31e Prins (aldste tot op hede 52 jaor, 6 maond, 3 waeke, 2 daag en 11 oor) is 't mich neet vuuël anders vergaon as mien veurgengers, alles waas schitterend en prachtig ik heb zó'n 250 foto's en 18 oor video-opnames, dus ik kan nog idderen daag de film truuk dreie en opniej geneete van de leuke momente en kosbare herinneringe.


Zoeë begós 't met de ièrste bespraekinqe met de Prinsekemissie, det waas allemaol spannend en weej hadde van allerlei ideeje, maar die kóste neet allemaol getollereerd waere: zoeë as knalgaele mantels en kartónne
medaljes.


Det hadde weej as Trio netuurlik te respektere.


't Idee waat erg good in de smaak veel, waas det miene lièfspreuk gezónge mog waere, en inderdaad det sloog euveral good aan.


Wat 't zinge betref kwaam 't good oèt, det ik same met Maria Möskes de 2e plaats met de leedjesaovend had gehaold, det goof toch weer eine ekstra kik um as zingende Prins te meuge optraeje.


D'n ièrste schoèk gebeurde al direk in 't begin, naodet weej de vlag hadde gehese veur de äöpening van 't sezoèn, woort de vlag ‘s aoves gejat, wao op weej gauw genóg veur d'n twieëde kièr de vlag meuste heise.
Ein paar daag later is die vlag waer stiekem beej ózze sikkertaris truuk gebrach, tot op hede óntbrik nog idder spoor van de dader(s) !!!!!


Vermeldingswaerdig zien de volgende belaevinge:

Weej zien met ein offisjeel gevolg euver de päöl beej Adjudant Peter zien femilie in Duusburg gewaes, dao waar 't beregezellig en woorte weej vorstelik óntvange, inkele femilieleeje ware zelfs al ein dieke waek van teveure zenuwechtig, want dao kwaam toch "De Prins oèt Venlo" !!!.


't Zal waal in 't teike van 't Duitslandjaor hebbe gelaege, det op oètnuuëdiging van De Wien, veur 't ièrs op de groeëte resepsie, ein voltallige aafvaardiging van 'n bevrinde vastelaovesvereiniging oèt Bad Hönninqen waam, en waal Karnavals Gemeinschaft Rot Weiss 1891 oèt Bad Hönningen met eure Prins Arno d'n 2e dae ós op ein spesjale meneer kwaam fillesitere, zeej brachte ein kleurrièke en aparte
sfeer in 't totale gebeure, wao weej biezónder van hebbe genaote.


Ouk waas d'r toen ein geweldige joekskepèl "De Vrolijke Vaganten" oèt Eindhoven um ós te fillesitere, zeej hadde zó'n half oor optraeje ingeplandl!', maar wiste zeej det zoeëiets heej neet meugelik is.


Ein merkwaardig moment waas d'r op de groeëte zitting, toen de Stadsprins Hay d'n 3e op de buun kwaam en 't woord kreeg, hae zei in ziene speech niks protokoleers, maar had 't euver ein van zien Adjudante dae vreejgezel waar en hae wis, det mien aldste dochter Evelyn, ouk vreejgezel waar en reep Evelyn (niks in de gate hebbend) op de buun, wao op hae ziene Adjudant Ron (Bolhaar) taege alle regels in vroog um Evelyn ein medalje um te hange um zoeë ein koppelingspoging te ónderneme. (P.S.'t is niks gewaore tösse die twieë)


Det ik de Ald Prinse op de nek heb gekrege is mien eige schöld, want die woele maar neet de naam van de Ald Prinse verandere in EX Prinse, det haet mich (en trouwes zeej ouk) op de Ald-Prinsereis minnig zweitdröppelke gekos um eur nao 2 oor en 2 stumminge d'r van te euvertuuge det zeej mich woele toelaote tot de ALD-(EX)­Prinseclub.


't Haet mich biezónder vuuël deug gedaon, det beej 't aaftraeje 't leedje waat ik geintroduseerd heb met ein aangepasde teks, "EINMAOL PRINS TE ZIEN", zoeë good in de smaak is gevalle, wao op idderein in de zaal 't refrein mei zóng, zoeëdet 't messchiens as tradisie beej 't aaftreeje gebroèk geit waere. 


Maar aan plezeer make zit ouk eine kièrzijde van de medalje, tièdes 't sezoèn kreeg Adjudant Frans (Vorstermans) ernstige hertklachte en haet 't sezoèn neet normaal kinne aafsloète, weej dachte det haole weej nao de genaezing dièk en döbbel in, maar in 't zich van de redding haet Frans 't neet mièr gehaold en hebbe weej Frans op 7 april 1999 begrave, gedrage door de Raod van Elf in vol ornaot. De Wien waas toen in groeëte getale aanwezig, waat veur Bea en Patrick toch ein groeëte steun is gewaes um dit verdreet te verzaachte en dao aan kin me zeen, det in ós Wien vreugde en leid, hièl dich beej ein leet en gezamelik wuurt gedrage.


As Prins van Frans en names meidekoempel Adjudant Peter, wille weej van dees gelaegenheid gebroèk make um alle Wienleje hertelik te bedanke veur 't meilaeve in dit trieste gebeure. 


As 31e Prins wins ik De Wien nog ein lang bestaon toe en det de jubileumkemissie 3x11 in 2000 gen millennium probleme taege kump, dan bin ik d, r van euvertuug, det weej allemaol ein geweldig jubileumjaor kriege.


Tot slot zal ik miene lièfspreuk veur óg zinge ..... "Chef du protocol dao geit-e haer" ........

 
POM POM,POM POM POMPOM POMPOM, POM POM etc.
 

VASTELAOVEND IN DEZE TEMPEL

DAO-OP DRÖKKE WEEJ OZZE STEMPEL

WEEJ LAOTE DE WIENERMOTER RONKE

EN EUVERAL SPRINGE DAN DE VONKE

BLIEF NEET STAON MAAR BLIEF BEWAEGE

UT HAET ZIEN VEUR EN OUK ZIEN TAEGE

GREEKE KINNE WEEJ NEET GEBROEKE

ANDERS WERKE WEEJ DIE NAO BOETE

WEEJ KINNE GENNE TIED EN OOR

WANT OS MOTTO IS, GANK ALTIED DOOR.

 
EX-Prins Jac 1e




<<< gank truuk nao de trio's van alle jaore


De Wien Venlo

De Wien Venlo

De Wien Venlo

De Wien Venlo

De Wien Venlo