Trio 1988:

Prins Arno I Bos†

Adjudant Ben Hendrickx

Adjudant Pierre Kusters

Vors: Gerard Seelen
Veurzitter: Sjeng Vullings†

De Wien Venlo

 

Liefspreuk:
 
Heej, op de splitsing van de waeg, wuurt ‘ne vastelaovend neet weggevaeg 
Heej is de Wien noow einmaol gebaore, en geit de Vastelaovesgeis noeëts verlaore 
Daorum zeg ik, same met Ben en Pierre, Leef Wienböl, "Dao geit-e weer"! 
 
Waat kin ik d’r nog van genete as ik dit opschrièf. 1988, ein jaor det ik noeëts zal vergaete. Same met Ben en Pierre meugde weej ‘t trio van de Wien zien. Ik kós mien oeëre neet geluive wie de veurzitter Sjeng Vullings mich belde en vroog of ik de nieje hoeëgheid van de Wien woel waere. Neteurlik heb ik jao gezag, ein paar kwante adjudante oètgezóch en toen same d’r taege aan. Waat hebbe weej genaote, lol gehad en leuke dinger meigemak. Te vuuël um op te neume, maar toch zien d’r inkele zake die ik beslis noeëts zal vergaete en die ik óg gaer wil vertelle. Net as alle veurgaonde jaore begós ós vastelaovesjaor met de leedjesaovend. Weej ware as trio netuurlik nog neet oètgerope, maar ik waas toen al gevraog um Prins te waere van de Wien. Geej zult waal begriepe det ik zièr gruuëts waas toen ‘t leedje "Zomerspruutje" as winnaar oèt de bus kwaam. Mien vruike Toos had namelik de teks geschreve. De mezièk kwaam van Frans Wassen † en Léon Bastiaans waas de zenger. 
 
Op zaoterdaag 9 jannewari 1988 waas ‘t dan zoeë wièd. Ós vastelaovesjaor begós met ein zier gezellig boeremoosaete beej Jan van Groenendaal in de Gouden Tijger. Hae had det aangebaoje aan de nieje Hoeëgheid van de Wien. Zoeëgezag, zoeëgedaon. Dees beejeinkóms waas jaomergenóg ein van de letste kière det Rietje Schreurs as Wienmerieke optrooj. ’t Woort opgevolg door Astrid Meijer. Same met Suzanne Sijbers haet Astrid ós de ganse vastelaovend begeleid. Rietje is wiejer gegaon as zengeres van vuuël vastelaovesleedjes in Venlo.
 
Waat mich altièd is beej gebleve en wao ik zièr gruuëts op waas, is det tièdes de prinseresepsie in de Maaspoort alle Ald-Prinse van de Wien aanwezig ware. Neemus óntbrook, alle 20 Ald-Prinse ware d’r um ós te fillisitere en eur lièfleed: "Al is de waereld nog zoeë groeët" ten gehuùre te bringe. Tièdes ós resepsie vónd nog ein biezóndere gebeurtenis plaats. Ik had de ièr eine nieje prinsescepter in óntvangs te meuge neme. Oèt hand van de maker, d’n hièr Funs Helsen, kreeg ik dae aangebaoje. ’t Dieke, zwaore, wienbölke waas verruùld veur ein niej slank wienbölke. Persiès zoeëas de Wienbölkes d’r vandaag d’n daag nog oètzeen. 
 
Euver oètzeen gespraoke. D’r ware d’r twieë in de Raod van Elf, die vónde det de Raod d’r neet good genóg oètzoog. Frans Wassen † en Wim Daemen hadde weer waat leuks bedach veur tièdes de zitting. Idder jaor vroote die twieë, tot vertwiefeling van ózze vors Gerard Seelen, waat oèt tièdes de prónkzitting. Dit jaor hadde zeej de Raod van Elf veurzeen van extra groeëte oeëre. Zeej vonde det de Raod dan baeter kós luustere nao waat d’r op de bühne gebeurde. De minse in de zaal loge in eine deuk en de vors had zoeë zien bedinkinge en wis neet waat hae dao mei aan meus.
 
Ik dink nog dök truuk aan ein zièr offisjeel gebeure. Altièd as ik in ós residensie Grand Kefee Maagdenberg kóm en det wilt nog waal ens gebeure, dan zeen ik dao ein schilderie hange met dao op ózze, helaas te vruùg euverleeje, ièrste vors/veurzitter, d’n hièr Sjaak Houben. Tièdes ós vastelaovesjaor woort det schilderie door d’n hièr John Keulartz offisjeel aangebaoje aan Sjaak zien vruike, Els †.  ‘t Schilderie kreeg ein plaetske in ‘t kefee naeve ‘t schilderie van Piet Janse †. ‘t Waas ein zièr bezóndere beejeinkóms wao weej as trio van de Wien beej meugde zien. Ik kin zoeë nog waal effe door gaon.
 
Ein klein verhäölke wil ik óg toch nog effe vertelle. Zoeëas iddere hoeëgheid van de Wien, had ik de gevel van ós hoès versierd. D’r kwame twieë blage veurbeej. D’n eine zag taege d’n andere: "Heej woeënt de Prins van de stad. Zal hae thoès zien?" "Nae, neteurlik neet", zaet d’n andere, "dae is noow aan ‘t regere". 
 
Kantteikening redaksie: 
*Arno waas vanaaf 1998 wies 2006 Veurzitter van de Wien. ‘ne Man dae de vinger op de pols heel.
*Hae waas jaorelang de “Lord Millimaeter” van de Technische Kemissie. 
*Arno haet hièl waat Prinselikke Wien-Trio’s begeleid en respektievelik óuk as Sirremoniemeister óntelbare kière zien
  steinke beejgedrage aan de oètstraoling van de Wien.
*Hae is in 2006 beneump as iërelid van v.v.De Wien.


<<< gank truuk nao de trio's van alle jaore


De Wien Venlo

De Wien Venlo

De Wien Venlo

De Wien Venlo

De Wien Venlo

De Wien Venlo