Trio 1987:

Prins Frans II Peters

Adjudant Cep van Mosseveld

Adjudant Bas Bossink

Vors: Gerard Seelen
Veurzitter: Sjeng Vullings

De Wien Venlo

 

Lièfspreuk:
 
Bekiek ‘t laeve van de zónnige kant
De Vastelaovend is weer in ‘t Wienerland 
Met kwats en lol, dreej dolle daag
Zoeëdet geej straks zegge maag 
Venlo blief Venlo, maar de Wien blief de Wien 
Nörges in Venlo zal ‘t oeits gezelliger zien 
Geej huurt ‘t luuj, ‘t is heejbeej gezag 
Wien-aoh-Wien, WAE HAD DET GEDACH...
 
Zoeëwie iddere ald-prins van De Wien zaet, is zien prinsejaor ‘t schoeënste. Det van mich dus ouk. Veur ós waas det in 1987. De Wien waas toen “1000 waeke ald.” Maar ‘t is werkelijk ein hièle belaevenis um De Wien ein jaor te meuge aanveure as Prins. Same met mien adjudante Kep en Bas (en neet te vergaete ós maedjes) meugse die ker trekke en d’r gebeurt óntzettend vuuël in ein prinselaeve.  Ik heb ‘t fotoalbum d’r nog ens op naogeslage en de steis versteld wao se euveral kumps, waasse duis en wae d’r allemaol op de resepsie kump. 
‘t Meis genaote hebbe weej alle dreej van de bezeuke aan kranke, gehandicapte en bejäörde minse. De zuus det die minse genete en det duit good. 
 
Wienprimeurs ware d’r genóg in 1987: De Wienmert, de nieje Wienbölkesgroep en de iërste Wienmeriekes Rietje Schreurs en Suzanne Sijbers. 
 
Leuke anekdote waas de weddeschap op d’n daag van ‘t prinsebal met Ald-Prins John Janssen, indertièd veurzitter van de Technische Kemissie. Desgevraog verklaorde ik al jaorelang det ik prins zoel waere. 
Veur mich, as lid van de prinsekemissie waas det de beste verdeidiging op de steeds truukkièrende vraoge wae d’r dit jaor prins zoel waere. Dit jaor waas ‘t dus ech waor, maar det kos John Janssen neet weite. Waat dae waal en ik neet wis, det waas, det hae adjudant beej Jocus zoel waere. Wie ik de middaag veur ‘t prinsebal as bestuurslid ens ging kieke of alles klaor waas veur ‘t prinsebal, vroog John aan mich; "Wae wuurt d’r prins vanaovend".  Wie gebroèkelik zag ik det ik det woort. John zei toen:" Lek mich de zök, det zaes dich idder jaor,…as dich prins wuurs dan waer ik dansmerieke. Ik zag: "John, dao hald ik dich aan".  En ik heb um d’r aan gehalde. Op de pronkzitting in de Maaspaort heb ik um, wie hae met de Jocus as Prinsetrio beej ôs op bezeuk kwaam, met ós Wienmeriekes as dansmerieke laote danse. 
 
Al met al eine schoeëne tièd um op truuk te kièke en aaf en toe nog ens opniej te belaeve door ‘t fotoalbum, det indertièd zoeë schoeën door de P&P is verzörg en met name door Toos Bos is ingeteikend. 
 
Kantteikening redaksie: 
*Frans waas d’n derde broor (ièrder Jan en Frits) van de Maagdenbergse familie Peters, dae Prins van de Wien woort. 
*Frans zoot as sikkertaris 3 jaor in de allerièrste Raod van de Wien en dus ouk 3 jaor  in ’t bestuur(1967-1970)
*Hae waas later weer as sikkertaris 14  jaor bestuurslid van De Wien.(1978-1992)  
*Ouk is hae jaore  lid en veurzitter van de Technische Kemissie gewaes. Hae haet vuuël Wienleedjes geschreve en gezónge. *Frans is um ál zien verdeenste in 1992 beneump tot Ièrelid van De Wien. 

Wien-weiteswaerdighede van 1987. Mien broor, ald-Prins Frits d’n Ièrste, waas det jaor 25 jaor getrouwd met Marlie.; Veur de 11e kièr woort ein leedje van mich bekroeënd in De Wien. Niej waas ouk det jaor de buutemars, geschreve door Wim Schreurs, welke door de hermeniekepel toen veur ‘t ièrs en nog altièd wuurt gespeuld op de Wienzittinge. 
 
Ouk niej waas det jaor de groep Wienbölkes. Nao óntzettend vuuël nievere arbeid van ein groeët aantal dames, die de kostuums in de aovendore in ‘t paskaemerke beej Janse en later in ‘t neikaemerke van Ans Seelen inein hebbe gestaoke, prissenteerde eine groep van ongevièr 60 wienbölkes, wao-onder weej as trio, zich op ein schitterende meneer in de Jocusoptoch. Resultaat waas eine iérste prins in d’n optoch van Jocus. Aan de nei-ploog hebbe weej, as trio, ein einmaolige ónderscheiding oètgereik in de vorm van eine zilver(kleurige) vingerhood.



<<< gank truuk nao de trio's van alle jaore


De Wien Venlo

De Wien Venlo

De Wien Venlo

De Wien Venlo

De Wien Venlo