Trio 1986:

Prins Karel I van der Randen

Adjudant Henk Buskes

Adjudant Guus Theewen

Vors: Gerard Seelen
Veurzitter: Sjeng Vullings

De Wien Venlo

 

Lièfspreuk:

‘t Ganse jaor werk ik met pen en pepeer.
Maar noow met joeks en ein good glaas beer.
Kóm minse, laot ós d’r aan beginne...
 Aan Vastelaovend in “De Wien”! Ouk dét mot kinne..
 
Wie weej op 1 jannewari 1986 eine niejaorsborrel ginge drinke in ós Residentie Hotel Maagdenberg, sloog de schrik ós um ‘t hert. In de veuraafgaonde aldejaorsnach waas d’r namelik brand gewaes in Hotel Maagdenberg. Blièkbaar waas d’r ‘ne veurpiel verdwene tösse de daakpanne. De schaaj zoel toch neet ál te erg zien? Want ‘t meus ummers “mién jaor” waere beej De Wien. Inkele beveurrechte persoeëne van De Wien ware op de huuëgte van dit feit.. Gelökkig veel de brandschaaj waal mei en kóste weej ós in ‘t geheim vaerder gaon opmake veur de “Groeëten Daag”. En det waas kort daag! Want, veurdet de “Dreej Keuninge oèt ‘t Oeëste” (6 jannewari 1986) zoele verschiene, zoele Guus, Henk en ik oètgeroope waere as ‘t Prinselikke Trio van 1986 en waal op 4 jannewari van det jaor. 
 
‘t Prinsebal waas ein geweldig festijn. Vuuël origineel verkleide groepe en faatse. Veur de joeksige aafwisseling dit jaor, in samewerking met notaris Chris Mulders (jury v.d verkleide), onthölde de Vors ós as nieje Trio. Guus en ik (leeje van de T.C.) ware, same met de andere leeje van de Technische Kemissie, verkleid en fiès geschmink as klosjáárs. We ware door Nol Peters † flink onder hand genaome, o.a. met zwarte tand, stoppelbaard, griès haor enz. Henk waas verkleid as kojboj. Nao de ónthölling hebbe we ós baove op de badkamer zoeë good en zoeë kwaod meugelik weer gefatsoeneerd en ós tand gepoets. Toen we tóch weer keurig opgeknap in de groeëte zaal arriveerde, krege we ós teikene van waerdigheid áán en um en kós ‘t bal offisjeel opgestart waere.
 
En toen ging alles wie ‘n film.‘t Vlaghijse met ‘t aanbeeje van de residensiesleutel door kastelein Piet Janssen † De raegenechtige, maar schoeëne optoch met ós as trio in ein koets met paerd op waeg nao de groeëte prinserecepsie in de Maaspaort.. De drök bezochde recepsie. De ontelbare bezeuke aan zustervereiniginge, maar ouk aan jónge en alde, kranke en gezónde minse... De Groeëte Prónkzitting in de Maaspaort met o.a. as Ière-gaste Hans Goertz en zien vruike oèt Gelaen. Daezelfde Hans, dae aldao op ós verzeuk nog ‘ns ziene en ózze “Wien evergreen” kwaam zinge...: “As ik dich zeen”. ... 
De dreej dolle daag, die um vlooge en veurdet we ‘t in de gaate hadde, meus alweer met ‘ne lach en ‘n traon de Wienvlag gestreke waere. 
 
De kleine zitting in november waas ouk veur ós ‘t moment van aaftraeje en veur mich persuuënlik de ièr um te waere opgenaome in ‘t als maar grutter waerende Ald-Prinse gezelschap. Op ‘t ind van deze gezellige aovend, kwaam veur ós dreej ‘t alternatieve en joeksige aaftraeje, verzörg door mien eige gimklub “K&S”. (Waat “K&S” beteikent zal ik maar neet vertelle, want det is een aafkorting van fièze wäörd, die ‘ne Prins ónwaerdig zien). De jónges van “K&S” goove ‘n demonstrasie weg van rek- en strekoefeninge, waoraan Guus, Henk en ik mei meuste doon, zoeëdet weej ouk lid kóste waere van dit “sportief” klubke. 
 
Al met al: ‘n ónvergaetelik jaor veur ós. En det ‘t ‘n good Wienjaor is gewaes, meuge blièke oèt ‘t feit, det allebei mien Adjudante door de Prinsekemissie in de jaore negentig ouk eine kièr zien oètverkaore as hoeëgste regeerder van “De Wien” ! 
 
Kantteikening redaksie: 
*Karel waas jaorelang Bestuurslid van “De Wien”,
*Karel waas lid van de vruùgere optochkemissie (in eíne persoeën) 
*Hae waas ruum 20 jaor lid van de Technische Kemissie  van “De Wien”. 


<<< gank truuk nao de trio's van alle jaore


De Wien Venlo

De Wien Venlo

De Wien Venlo

De Wien Venlo

De Wien Venlo

De Wien Venlo

De Wien Venlo