Trio 1969:

Prins Gijs I van den Broek

Adjudant Toen Smits

Adjudant Frans Peeters

Vors: Jac Houben
Veurzitter: Jac Houben

De Wien Venlo
 
Lièfspreuk:
 
Laot gaon dae wage, ‘t is weer zoeë vaer 
D’r kan ós noow niks mièr gebeure 
Sleip d’r óg maar good doorhaer
Zoeëdet gen kleier scheure.
 
Ik zal in ‘t kort mien Prinseverhaol aan dit pepeer toevertrouwe. Ein van mien ièrste Prinse-ervaringe waas, det ik same met mien pas beneumde adjudante Toeën Smits en "Pièpe-Frans" Peters as ‘t aanstaonde nieje trio ( dus nog geheim ) qua veurbereiding op "trainingskamp" ging. Weej ginge o.a. oètgebreid oefene met ‘t zweie van de erm, ‘t smiete van konfetti en serpetines en ‘t oètgoeëje van snoep. Maar die blage van mich hadde alle snoep al opgezoebeld en dus pakde ik as alternatief struigood , maar d’n hagelslaag oèt de kas en heb ik dae maar, tot stómme verbazing van mien adjudante, in mien hoèskamer róndgestruid. Effe later ging miene adjudant Frans zich in eine praos zitte en bleek, det ziene bóksebaom gans ónder de plekkerige hagelslaag zoot. Weej hebbe same vuuël jen gehad.
 
Ouk in ós residensie, Hotel Maagdenberg , hebbe weej d’r dök enne gezellige "puinhoup" van gemak, smeis tot ergernis van Mooder Jansse-van Woezik. Die zei dan waal ens taege mien vrouw Pit (z.g.) op zien Helenaveens,: "Godde geej met zónne gek nao hùùs?"  Al met al hebbe weej vuuël gelache. Ik kin heej ore euver vertelle, maar dök schete wäörd tekort. 
 
Mien aaftraeje as prins ging ónder ‘t motto: "Op waeg nao de Prinsehemel".  ‘t Waas ouk op mien verzeuk, det ik neet woel aaftraeje as "bingel", maar braaf as enne "Prinse-ingel". In de Prinsehemel verbleef ik aevel maar hièl kort, umdet ik as ingel met mien vleugelkes persé dwars door ‘t kefee woel vleege. De taofel in ‘t kefee waas mien vleegbasis, maar tot miene schrik werkde mien ingelevleugelkes neet good en belandde ik met eine geweldige kladderdaats en met gebraoke vleugels, op de vloer. Zoeë stónd ik weer met twieë veut op de waereld. 
 
Leef minse, det woel ik in ‘t kort effe kwièt euver miene prinsetièd in ‘t 2e jaor van De Wien. Ein dingk is zeker: ‘t Kós toen ouk allemaol! Vuuël velt d’r van det jaor, ouk in leef en leid, nog te vertelle, maar heej hald ik ‘t maar beej. 
 
Ik zoel wille besloète met mien nieje motto : "Ik bin eine mins van weinig wäörd, maar, des te mièr van joeksige streke en det is in ‘t verleeje minnigmaol gebleke". 
 
Kantteikening redaksie: 
*Gijs waas ( kompleet met roeëje frak ) d’n allerièrste Chef du Protocol van de Wien. 
*Same met zien broor Sjraar haet Gijs al die jaore o.a. prachtige Prinse- en Adjudantemantels veur de Wien geneid! 
*Gijs waas nege jaor lid van de iérste Raod van Elf en dus ouk de iérste nege jaor bestuurslid. 


<<< gank truuk nao de trio's van alle jaore


De Wien Venlo

De Wien Venlo

De Wien Venlo

De Wien Venlo