Raod van Elf

De raod van elf besteit zoeë-as de naam al duit vermoede oèt minimaal elf persoeëne, wao ónder de Vors, de Chef du Protocol en de sirremoniemeister. Langs deze elf Raodsleje kinne dökker aspirant raodsleje functionaere die ein jaor mei meuge loupe um te preuve wie 't is um beej de raod te zien en of zeej ouk de geschikte persoeëne daoveur zien. Deze aspirant leje kinne dan waere gekaoze tot raodslid door de algemeine lejevergadering as zeej nao oordeil van de Raod van Elf en ’t Besteur good gefunctioneerd hebbe in eur proofjaor. Dit veur ein periode van veer jaor.

Waat doon noow die verschillende ‘raodsleje’ zoeë-al. Te beginne beej de vors; hae is de veurzitter van de "Raod van Elf". De vors wuurt door de jaorvergadering van de vereiniging veur ein periode van veer jaor gekaoze. Hae mak taeves deil oèt van ’t besteur van de vereiniging as aafgevaardigde van de raod van Elf. De vors is in ‘t vastelaovesseizoen: van d’n elfde van d’n elfde wies aswoensdaag de spraekbuùs van de vereiniging. Boète ‘t seizoen velt die ièr te beurt aan de veurzitter. Dink noow neet det zeej dao allebei zoeë op staon, in taegedeil, ze regele same met de euverige besteursleje ‘t hièle jaor door verschrikkelik vuuël dinger. De vors presenteert ouk zoeëvuuël wie meugelik de diverse evenemente van de vereiniging, dink heej beej aan de Gala-aovend, wao 't nieje trio wuurt oètgerope, aan de prónk- en seniorezitting en aan de diverse resepsies.

De sirremoniemeister (de man met de bel) is verantwoordelik veur de ‘Wienmeriekes’ en net as de vors ein stök presentasie beej de ‘Wien’ evenemente. Beej de prónk- en seniorezitting haolt de sirremoniemeister, same met zien Wienmeriekes, zoeëas gebroèkelik de artieste van achter oèt de zaal de buun op, ónder de klanke van ein bekind Wienleedje en met ‘t luuje van zien bel. Vaerder veurt hae op bevel van de vors de waal bekinde döbbele of dreej döbbele ‘Wienbol’ oèt. Dök haet de sirremoniemeister ouk de functie as Vice-vors.

De chef du protocol is in ièrste instansie verantwoordelik veur de prins en zien adjudante. Hae begeleidt ut trio vanaaf ‘t moment det zeej aan mekaar veurgesteld waere wies det zeej in november weer aaf mótte traeje. Hae zörg det 't trio good gekleid is, mak aafspraoke veur 't passe van de mutse en 't make van de foto's. Vaerder is hae same met de Raodsbegeleiders,(RB) kort gezag Arbie, verantwoordelik veur de kleier van de kómplete raod.

Zoeëvaer de ‘belangrièkste’ funksies binne de raod van elf. Dink noow aevel neet det de res niks duit, in taegedeil, veur geneumde funksies zien binne de raod plaatsvervangers aangeweze, mót 't vervoer van de raod geregeld waere, is d'r ein sikkertaris en eine penningmeister nuuëdig zoeëdet idderein waal ein funksie haet.

De Raod van elf begeleidt same met de Wienmeriekes de Prins met zien Adjudante vanaaf ‘t moment det zeej oètkómme wies det zeej aaftraeje. Maar in ièrste instansie, en det geldt veur alle raodsleje incluis de vors, sirremoniemeister en chef, wuurt van ein raodslid verwach det hae de vereiniging op ein waerdige wièze vertaegewaordig en nao boète toe oètdruuëg.

Kóntakpersoeën: Eric Martens (Vors Wienius)
Tillefoon: 06-18039130
E-mail: ejfmartens@gmail.com

De Wien Venlo