Jeugtrio 2016:

Martijn I (Keller)

Adjudant Mindte (Peters)

Adjudant Nanna (Bouten)

Vors: Brian Vervoort
Veurzitter: Marc Verheyden

Leef Wienbölkes en Wienböl,

Weej Dreej, neet det zanggruupke, maar ’t jeug dreejspan van VV De Wien van ‘t jaor 2016 hadde berich gekrege um ’n verhäölke te schrieve veur de Alde Feep.

Euver wie weej Dreej ´t allermoeiste en beste vastelaoves jaor oeits hebbe meigemak en wie weej ´t belaef hebbe.

Heej os verhäölke.

´t Waas dónderdaagaovend 14 jannewari 2016, ´t waas kalt en schuverig. De wind weide door de buim. ´t Waas ech gen waer um nog nao boete te gaon maar stiekum ware weej toch hiel erg zenuwechtig want ´t kós bes wal ens zoeë zien det de bel ging en det d´r emus aan de deur stónd van de jeugkemissie van De Wien. En jao huur ´t gebeurde, de bel ging. De zenuwe gierde door ós lief. Ós pap en mam die wiste det neteurlik al en die hadde stiekum al alles ´n bietje geregeld. De kleier die we aan meuste loge al klaor en weej  meuste mei in d´n auto. We wiste neet wao we nao toe gebrach woorte want weej hadde ´n maske op. Op de plaats van bestumming woorte weej nao binne geleid en meuste we gaon zitte. ´t Waas muuskesstil en weej ware op van de zenuwe. Wao zien we en wat waer ik, en ouk hiel spannend, wae zit der nog mier in ´t dreejspan. ´t Deurde en deurde en toen haet de nieje hoeëgheid Prins Ed d´n 2e, ein toespraok gehalde en toen moch intelik ós maske aaf.
Toen veel alle spanning van ós aaf. Dao zote we dan, Prins Martijn d´n 1e met zien adjudantes Mindte en Nanna. D´r barsde ein geweld los: van alle minse die daobeej aanwezig ware. D’r woort gezónge en gedans en ‘n bietje gedrónke wies in de late eurkes. Ouk hebbe we ózze “Yell” geoefend met ‘t groeëte dreejspan:  “Boetegewoeën, wonderschoeën, Jeugdtrio, vastelaovend same”.

De vriedaag, we meuste nao schoeël, ‘t waas moeilik um ózze mond te halde en ‘t is ós toch gelök nao dae langen daag. ‘s Aoves meuste weej um 18.15 uur beej de Maagdenberg zien, wao weej ós raodskleier aan krege.  De zaal waas good gevöld met minse. Idderein waas dao, femilie, vrinde en ouk hiel vuuel lierare van de schoeël, det waas wal leuk. Weej woorte oet de zaal gerope. Weej krege ‘ne versierde taofel euver ózze bums en weej zien toen nao binne geloods. Waat waas det werm. ‘t Groeëte trio haet toen 't oètroopgedich veurgelaeze en höfde de taofel van ozze bums. Nemus had ‘t geraoje det weej ‘t nieje jeugdreejspan van 2016 ware.

Feeste, party, lol en plezeer. De ganse aovend hebbe weej gefees. Weej hebbe gezonge, op de taofels gestaon, en wat nog mier. ‘t Waas ‘n kei gezellige leuken aovend.

Jeugmiddaag en resepsie!

Zaoterdaagmiddaag waas de jeugmiddaag wao hiel vuuel kinder van de greundveldschoeël ware, jónk en ald allemaol beejein. Weej makde weer eine geweldige entree! Piere en swinge met de ganse koedeljach! Meug, maar voldaon ginge we met os ganse gevolg lekker ff baove van de vutjes aaf en krege un telderke friet met ‘n frikandel of kroket. Toen kwaam ós Moment Surpreme, ós groeëte Resepsie! We hebbe ontzettend vuuel  leuke kadootjes gekrege. ‘t Waas ontzettend drök zelfs ‘t groeëte dreejspan van Boete de Paort kwaam langs (geej snap det neteurlik waal, det waas Mindte ziene pap) en nao al det gekös ware we waal  toe aan ein klepke en ein chipke.

De Heilige mis!

Vandaag ware weej vruug oet ós kribke. De mis in de familie kerk waas hiel speciaal veural umdet deze gans in ‘t Venloos waas. Prins Martijn moch ein stökske veurlaeze ondersteund door zien adjes. Nao de mis gauw de wage op um te beginne aan de groeëte optoch richting de Maagdenberg.
Det waas gaaf, maar kalt. We meugde vuuel snoep goeje en d’r stonde vuuel minse aan de kant te kieke, det waas hiel erg leuk, zelfs Harry Pouwels stond örges op ‘n hukske te kieke en dae keek zien ouge oet, wie gezellig weej ‘t hadde.
Daonao waas de groeëte resepsie van ‘t groeëte dreejspan, dao waas ‘t kei drök. We hebbe ós kadootje gegaeve en zien toen boete gaon speule in de snieë.

Resepsies, Half Häënke, ontbijt en foto!!

We zien ouk nog nao hiel vuuel resepsies gewaes van ós kollega-jeug-dreejspanne. Sommige waren kei leuk maar d’r ware der ouk beej die weej minder leuk vónde.

27 januari woorte weej verwach in de Maaspaort want dao waas de jeugzitting van “Half Häënke”.
Dao waas ‘n kinderzitting en die waas best wal kwant. Alle andere dreejspanne waren ouk dao, ‘t waas ‘ne gezellige boel.

Zaoterdaag 30 jannewari hebbe weej ‘s morges vruug iers ein super lekker ontbijt gehad beej ózze Prins Martijn, dae daags daoveur 12 waas gewaore, dus dit waas zien feesje.
Daonao zien weej met Marc en Fred nao de Doolhof gereje um de jeugprinsefoto te make. ‘t Waas naat en kaat maar ouk weer hiel gezellig.

Bliericksen daag en sjampanje-ontbijt beej de groeëte Prins!

Weej meuste ós um 10 oor verzamele beej de Maagdenberg en van dao oet zien weej nao ‘t hoes van Prins Ed d’n 2e geloupe en dao hebbe we ‘n super lekker ontbijt gehad met chips en cola d’r beej.
Daonao de partybus in en toen nao Blierick gereje en dao hebbe we staon swinge met de groeëte prins van de Wortelepin. Daonao nao de reseptie van de Vaegers en van dao oet nao de Pimpelaers en toen truuk nao de Maagdenberg wao we nog wat hebbe gegaete en toen zien we nao de reseptie van Boete de Paort gewaes. Dit is normaal neet gebroekelik maar noow waas d’r ‘n oetzóndering want de pap van Mindte waas dao adjudant, dus det vonde weej wal leuk um det dreejspan ouk te fillicitere. Toen zien we nao hoes gegaon, want weej ware aafgebrand. ‘t Waas toch ‘ne hiele lange en drökken daag.

Vastelaovend op schoeël en Muts van de Bluts groeëte dreejspan!

Vriedaags veur ‘t begin van de vastelaovend meugde weej nao ózze schoeël toe. Dao waas ‘t schoeëlvastelaovesfees. Alle kinder ware leuk verkleid en d’r woort vuuel gehos, gesprónge en gezónge. ’s Aoves hebbe we beej de elders van Mindte nog ’n hepke gegaete en van dao oet zien we met z’n alle nao de Maagdenberg geloupe en dao waas de Muts van de Bluts van ‘t groeëte Dreejspan van De Wien.

Det waas bes wal emotioneel veur ‘t groeëte dreejspan. Maar naodet alle emoties gezak ware woort d’r ‘ne feesaovend gemak dae weej noeits mier zulle vergaete, waat ein fees. We ware pas um 2 oor ‘s nachs thoes, zoe leuk waas ‘t. Weej woele nog wal blieve maar die elders van os hadde de tesse vol en ware blie det ze nao hoes toe koste. Weej ware eure Truus-Truus. Want d’r mot toch emes de “Bob” zien.

Vastelaoveszondaag, Kinderoptocht en Muts van de Bluts!

De vastelaoveszondaag, ózze letste daag as jeugdreejspan van De Wien. We meuste ós um 11.30 melde in ‘t Ald Weishoes. Van dao oet zien weej in de kinderoptoch richting ‘t Stadhoes geloupe en dao zien weej nog op de foto gegaon met ‘t groeëte dreejspan van de Jocus. Truuk in ‘t Ald Weishoes dao gebeurde ‘t, Nicole, de mama van adjudante Nanna, ging efkes eure jas ophange baove aan de kapstok, maar vaerder dan de trap is ze neet gekómme. Ze verstapde zich en veel op de grond. Konklusie, Nicole meus nao ‘t gashoes. De stumming waas ‘n bietje minder maar ‘t woort weer hielemaol good gemak wie Nicole weer truuk waas. D’n aovend woort langer en langer en later en later. Weej ware inmiddels in kefee de Alde Mert beland en dao waas ‘n geweldige stimmung. Toen kwaam Jocus toekoms binne en die hebbe beej ós toen de Muts van de Bluts gedaon. We zien met eur, op de nek, gezellig ‘t kefee door gegaon en we hebbe nog op de bar staon danse met os dreej. ‘t Waas geweldig maar we hebbe toch ‘n träönke gelaote.

Dit waas ós aafsloeting, waat waas det ‘ne waanzinnige leuke, joeksige, kwanten tied.
Um noeits te vergaete.

Veur dit alles wille weej neteurlik idderein bedanke dae det veur ós meugelik haet gemak, os elders, breurkes en zuskes en neteurlik de Jeugkemissie van De Wien.

Bedank ‘t waas onvergaetelik!!!!!!!!!

 

 

 

 

 

 

 

 



<<< gank truuk nao de trio's van alle jaore