Jeugtrio 2014:

Luuk I Brouwer

Adjudant Bas van Deijck

Adjudant Baer Janssen

Vors: Milko Christis
Veurzitter: Marc Verheyden

Geheim oètrope
Waat ’n spannende en leuken aovend! Vruug in de aovend stond de jeugkemissie opens veur ós deure. Ièrs krege we te hure det we neet in de Raod van Elf zoote, maar al snel huurde we det we ’t nieje jeugtrio woorte! Met ’n maske op ginge we nao ’n geheime lokasie, wao we ièrs op ‘nne stool mooste gaon zitte. Door ’t groeëte trio woorte we ontmaskerd en hebbe we fees gevierd wies in de kleine eurkes.

De Jeugjoeksaovend
’t Waas op schoeël bes waal moeilik um niks te zegge, idderein bleef vraoge wae der in ’t trio zoot. We verzonne ’n gans ander trio um maar niks te verraoje. Op de jeugjoeksaovend traoj ièrs ’t alde trio aaf en ware der moeëje optraejes van de Madsonklub en twieë zeve jäörige jónges. Nao des optraejes woorte we stiekum in ‘nne groeëte kikker gezatte, wao weej oètspronge naodet ald prinses Lorena de kikker had gekös, ’t fees kós beginne.

Jeugmiddaag en reseptie.
‘s Middaags waas de jeugmiddaag met hièl vuuël kinder. D’r woort gedans en de polonaise geloupe en kloon Japie waas d’r ouk. Nao aafloup hebbe we beej De Maagdenberg gegaete en daonao waas ós eige resepsie. De zaal waar bómvol, idderein had d’r zin in en weej hebbe super vuuël kedoos en sloek gekrege. Nao de resepsie hebbe we nog wies twieë oor gefees en op de taofels gedans en gezónge. ’t Waar ‘nne geweldigen daag, in ein woort SUPER!!!

H.Mis, intoch en groeëte resepsie
D’n daag begós met de mis, wao verschillende moeëje leedjes woorte gezónge, ouk ’t Kepelke waas erg moeëj. Daobao waar de intoch van De Wien wao we baove op de wagen lekker met sloek koste te struije nao de minse die naeve de kant van de waeg stónde en we ouk partiepoppers hebbe aafgestaoke. Nao aafloup van de intoch waas de resepsie van ’t groeëte trio wao weej de presentjes hebbe oètgedeilt, maar daonao zien weej lekker gaon speule in De Maagdenberg.

Foto
Al vruug in de morge ginge we nao ’t Doolhof in Tegele um ein foto te make van alle jeugprins(es)e en adjudantes oèt de regio. Door de vere op de muts en de verschillende gruute van Bas en Luuk móste we dök op ’n andere plaats gaon staon veurdet de foto gemak kós waere. Oètintelik is ’t toch gelök en stonde we met dees foto in de Trompetter.

Sjampanje ontbijt en Bliëricksendaag.
Weer ‘nne leuken daag, we ginge met de bus same met ’n joekskepel, de groeëte Raod van Elf nao prins Ruud d’n ièrste, wao we soep, eier, broèd, knak en nog vuuël mier lekkere dingen hebbe gegaete. Nao det lekkere aete zien we nao de resepsies gewaes van De Wortelepin, Den Oeles en De Vaegers.

Vastelaovend op de Greunveldschoeël
We meuste ós opstelle in de gymzaal. Ièrs ginge we nao de viering van de baovebouw en daonao nao Pinokkio, wao ouk ‘nne prins waar, Prins Tren I. as letste ginge we nao de ónderbouw en hebbe lekker gefees.

Resepsies
We zien nao hièl vuuël resepsies gewaes, zoeëas de scouting Hertog Reinoud, scouting Manresa, De Kwas, De Päörtjes en we hebbe hiel vuuël medaljes gekrege. Dök kwame we op met ’t leedje “Vrouwkes” en dao ginge we gans van oèt ós daak. Ouk zien we nao de oma en opa van Luuk en de opa van Baer gewaes, die koste neet op de resepsie kómme en zeej woele ós gaer in vol ornaat zeen, ózze Vors Milko haet ‘nne wienbol oètgebrach en we hebbe lekker sloek gegaete. We zien ouk op de verjäördaag van raodslid Timo gewaes, waas bere gezellig.

Jocus Pocus optoch.
Weej lepe same met de Raod van Elf, de sirremoniemeister, de Vors en de dansmeriekes met de kinderoptoch mei. Ouk ós moders dochte effe det zeej ouk dansmeriekes ware en hebbe met de Jocus Prins gedans. Nao de optoch ginge we nao de resepsie van Jocus Toekoms wao we ouk weer ein lekker feesje hebbe gebouwd.Ouk zien we nao de resepsie van de Moeraskwaakers gewaes en we woorte nao aafloup nao de Maaspoort gebrach wao we nog effe lekker hebbe gefees en kattekwaod oèt hebbe gehaold. Toppie!

De brunch en de muts van de bluts
We ginge brunche beej De Maagdenberg, ’t waas lekker en ’t waar dao lekker drök. Toen kwaam d’r ’n minder leuk moment, same met ’t groeëte trio woorte we ontmanteld. Dit waas ’t ind veur ós, de vastelaovend waas veurbeej.

Gelökkig meuge weej in 2015 nog eine kièr aantraeje as trio zoeëdet we nog neet ech aafschied hove te neme van dees geweldigen tièd.
Weej wille idderein bedanke die der aan haet meigewerk um dit veur ós ein ónvergaetelikke tièd te make.

Vastelaovend same, Jeugtrio 2014
Prins Luuk I,
adjudante
Bas en Baer.




<<< gank truuk nao de trio's van alle jaore