Jeugtrio 2011:

Prins Joey I Beerkens

Adjudant Dimphy Leijssen

Adjudant Laura Storm

Vors: Giel Thissen
Veurzitter: Marc Houwen

Dónderdaag 3 fibberwari 2011 woort d’r aan de deur gebeld beej ós alle dreej. Beej Joey stónde Fred en Nicole aan de deur, beej Dimphy Marleen en Marc, en beej Laura Ingrid en Marc. Weej krege toen te huure det we neet in de Raod van Elf zote maar in ‘t jeugtrio. We meuste snel ózze kleier aantrekke en vertrokke per auto nao ein geheim adres. Laura reej gewoeën ein rundje met de auto umdet ‘t bekind make beej Laura thoès waas.

D’r ware allemaol al minse beej Laura thoès maar die ware muùskesstil. Weej woorte geblinddeuk en gemaskerd binne gebrach en meuste op ‘n stool gaon zitte. ‘t Deurde bes lang maar we meuste wachte op ‘t groeëte trio want die kwame ós de maskes aafdoon. Toen woort bekind gemak det Joey de nieje hoeëgheid waas en Laura en Dimphy ware zien adjudantes. Toen alles bekind waas zien we met Nicole en Ed nao OCE gereeje um de officiële foto te make, dao nao hebbe we nog lekker gefees.

De volgende daag hadde we gewoeën schoeël en we meugde niks vertelle want ’s aoves waas ‘t oètroope. Allein Meneer Pieter waas ‘n bietje dóm, hae dach det ‘t oètroope al gewaes waas en winste ós perficiat en toen wis netuurlik idderein det weej ‘t jeugtrio van dit jaor ware.

‘s Aoves waas ’t oètroope: weej meuste ózze raodskleier aandoon en ‘t trio van veurig jaor de mantels. Die traojde dan aaf en ‘t nieje trio woort bekind gemak. We ware bes nerveus want we stónde op de buun as Raod van Elf en Pim en Lorena kwame as kabouter verkleid binne met ‘n hiele groeëte wienbol en idderein dach det det ‘t nieje trio waas maar weej wiste baeter. Zeej vertelde euver ózze hobby’s en zoeë woorte weej ein veur ein bekind gemak, ze ónthulde Lorena, ‘t zuske van Laura Adj. Nr 1.
Toen woort Pim ónthuld, broor van Dimphy Adj. Nr 2. Maar wae waas de derde, want de zus van Joey \Sharina stónd gewoeën in de zaal dus idderein zag: Joey kin ‘t neet zien maar hae waas de Hoeëgheid van 2011.

D’r woort nog gefees en de volgende daag waas de jeugmiddaag (5 feb.) met allemaol kinder van de Greuneveldschoeël en clown Japie.

Nao de jeugmiddaag hebbe we met de jeugkemissie en de Raod van Elf frietjes, frikadelle, kipnuggets en krokette gegaete. Nao ‘t aete meuste weej ós klaor make veur de resepsie er kwame vuuël minse en allemaol kemissies van de Wien, femilie en vrinde en weej krege vuuël kadoos, we deeje ze allemaol in ein groeëte doeës die achter ós stónd, idderein had ‘n eige doeës met zien naam d’r op.
We stónde ech in de schiènwerper, det waas bes akelig.

Nao de resepsie zien we nog met de jeugkemissie en femilie en vrinde in de kefee vaerder gaon feeste. Op ’n gegaeve moment stónde we op de taofels te dansen en Marleen waas beej idderein de haor aan ’t toupere, weej zoge d’r toen beeldschoeën oèt. De volgende daag haet Laura zien vader laote schrikke met zien moeëje kapsel.

Ein paar daag later waas Yvon, de moder van Joey, jäörig, we zien toen met ‘n klein gezelschap nao eur verjeurdaag gewaes. Yvon waas erg verras, want Joey waas stiekem nao Marc geloupe en had zich rap umgekleid, maar had taege zien moder gezag det hae nao de wc ging.

13 fibberwari: Heilige Mis
We kwame beejein in Huize Maagdenberg en ginge ós baove verkleie as trio dao nao lepe weej gezamelik met ’t groeëte trio Prins Jos d’n derde en zien Adjudante Marcel en Roland nao de kerk. Joey meus nog ‘n stökske in de kerk veurlaeze en d’r woort gezónge en veurgelaeze. Op ‘t ind krege we nog ein roeëzekrans van Pastoor Spee.
Nao de Mis waas de optoch door ’t Wienrièk, weej meuste op ein koets en meugde snoep nao de kinder goeëje. Aansloètend waas de groeëte resepsie van ‘t groeëte Trio en weej gove aan de gaste kleine geschinke, later nome de dansmarietjes det euver. John en Mark, ózze vaders, meuste ouk nog zinge met eur winnende leedje.

26 fibberwari:
Weej kwame beej Huize Maagdenberg beejein en ginge ós baove umkleie.
De vader van Dimphy, Fred, had ‘n magneetbord op de auto wao-op stónd Prins Joey 1ste adj. Laura en Dimphy . Daen daag hadde we dus ein echte prinse-auto.
We ginge nao de resepsie van VVV 03, de Päörtjes en de resepsie van de Kwas.
Weej kómme dan met ós mezièkske binne, gaon de buun op, euverhandige ós kedo en kriège van ‘t Trio eur medailje .Toen alle resepsies aafgeloupe ware ginge we weer truùk nao de Maagdenberg.

27 fibberwari: Blièricksen daag
Weej meuste um 10 oor verzamele beej de Maagdenberg en zien toen same met ‘t groeëte gezelschap nao ’t hoès van Prins Jos geloupe. Veur de deur hebbe we toen gezónge, dao nao ginge we nao binne um beej ‘t groeëte Trio te óntbijte, det waas erg gezellig. Toen we klaor ware met aete zien we met z’n alle truùk geloupe nao de Maagenberg.
Dao stónd ein groeëte bus klaor um nao Blièrick te rieje, weej zien toen de gansen daag met ’t groeëte Trio meigegaon. We ginge nao ‘t Trio van de Wortelepin en aansloètend ging ‘t groeëte Trio nao de Vaegers, wao weej later ouk nao toe ginge, maar weej makde nog ein tössestop beej Beledoko, dao stónd ein schattig boerebroèdspaar, weej meuste op ózze kneen, anders ware weej vuuëls te groeët.
We ginge met de bus truùk nao de Maagdenberg en hebbe toen met ‘t klein gezelschap en groeëte Trio en de jeugkemissie nog gegaete beej de Maagdenberg. ‘t Groeëte trio ging toen nog nao resepsies toe.

Vastelaovend op schoeël
Op schoeël hadde weej ózze vastelaoveskleier aan, maar weej meuste ós medein umtrekke.
We lepe toen nao ’t jeughoès wao groep 1-4 eur vastelaovesbal had, we hebbe toen met eur de polonaise gedans en dao nao kwaam Prins Jos d’n derde met zien adjudante ouk nog. We zien toen ouk nog met ‘t Trio nao de crèche gewaes en die kinder vónde ‘t hiel leuk det weej kwame en ze krege ouk nog ein echte medalje.
We lepe truùk nao schoeël, dao ginge weej nao de viering van groep 5-8. Weej woorte ‘t podium op gerope, meuste effe ein präötje doon, Laura meus zich snel umtrekke umdet ze nog meus danse.

Later daen daag zien weej nog beej ’t Prinsetreffe in Tegele gewaes, dao kwame alle jeudtrio’s van groeët Venlo beejein, det waas bes cool. Weej hebbe toen nog gegaete beej macDonalds en ’s aoves hadde we nog de resepsie van de Madsonclub.

Vastelaoveszóndaag: Kinderoptoch en resepsie Jocus toekoms.
Weej lepe de kinderoptoch met ‘t ganse gezelschap door de stad en aansloètend de resepsie beej ‘t Ald Weishoès, dao nao ginge we met de auto nao de resepsie van de Moeraskwakers.
Vastelaovesmaondaag hadde we vreej en dinsdaag kwame we um 10 oor beejein um te óntbijte met femilie en vrinde beej de Maagdenberg. We krege alle dreej ein boerekeel aan. De res van d’n daag ginge we lekker nao de stad. ’s Aoves ware we rónd 22.00 oor truùk in de Maagdenberg, we hebbe toen de gansen tièd weer op de taofels gedans met ‘t groeëte Trio. Um 24.00 oor ginge we allemaol nao boète, de wienvlag woort oèt de vlaggemas gehaold en dit waas ‘t ind van ein hiele moeëje vastelaovend.

We ginge met de jeugkemissie nao baove en dao woort Joey, Laura en Dimphy de mantels en de mutse aafgedaon. De elders van ‘t trio hadde nog ein kedo veur de jeugkemissie as dank veur de gooje zörg.

Weej as trio zulle dezen tièd noeits mièr vergaete, ‘t waas ein super gave gezellige geweldige super tóffe coole belaevenis. Ein fantastische vastelaovend um noeits te vergaete.

Prins Joey d’n 1e en zien Adjudante Laura en Dimphy.



<<< gank truuk nao de trio's van alle jaore