Jeugtrio 2009:

Prins Kevin I Verheijden

Adjudant Gina Drissen

Adjudant Loeky Gitsels

Vors: Ron Gubbels
Veurzitter: Marc Houwen

Leef Wienböl en Wienbölkes, 

Op dónderdaag 22 jannewari 2009 woort d’r beej ós alle dreej aangebeld….

 Beej Gina stónde Marleen en Ingrid veur de deur, beej Loeky Fred en Marian  en beej  Kevin Jacqueline en Nicole. Taege ós dreej vertelde zeej det weej helaas neet in de Raod van Elf zote maaaaarrrr……... in ‘t jeugtrio van de Wien !! Det waas veur ós alle dreej waal effe schrikke! Weej meuste ‘ne zwarte bóks, witte bloes en zwarte schoon aan. Daonao woorte weej geblinddeuk en nao ein geheime locatie gebrach. Dao meuste weej op ein bank gaon zitte. ‘t Waas muuskesstil in de kamer dus weej wiste neet wae d’r allemaol dao waas en natuurlik ouk nog steeds neet wae d’r nog mier in ‘t Jeugtrio zoot.

Toen kwaam ‘t groeëte Wientrio binne ónder begeleiding van ‘t waal bekinde leed “..as ik dich zeen..”. Daonao woorte weej intelik ónthöld door Prins Marc en zien adjudante Nik en Chris en wiste weej det weej ‘t nieje jeugtrio van de Wien ware: Prins Kevin I en zien adjudante Gina en Loeky.

Daen aovend hebbe weej ouk nog de officiële foto’s gemak beej OCE, aansloètend hebbe weej nog stiekum gezellig gefees met ózze elders, breurkes, zuskes, ‘t groeëte trio en de jeugkemissie beej Gina thoès. 

De volgenden daag meuste weej gewoeën nao schoeël, bes waal spannend want weej meugde natuurlik niks zegge. ’s Aoves waas de oètroopaovend van ‘t Jeugtrio beej de Wien.  Ièrs zóng de Greuneveldschoeël eur vastelaovesleedje en traoj ‘t alde jeugtrio aaf. Man waat ware weej zenuwechtig en hadde weej berg kriebels in de boèk!

Naodet ‘t groeëte trio binne waas woorte weej 1 veur 1 oètgerope. Yes, intelik meugde idderein weite det weej ‘t nieje jeugtrio van de Wien ware! 

D’n daag heejnao waas de jeugmiddaag, d’r ware hiel vuuël kleine kinder, Clown Japie kwaam ouk nog. Nao aafloup hebbe weej gezellig met de Raod van Elf en de jeugkemissie frietjes met frikadelle en krokette gegaete. Det waas groeëte fun natuurlik!

’s Aoves waas ózze receptie. We ware hiel zenuwechtig en weej stónde ech te razele, weej meuste ós opstelle beej de deur. De raod waas al in de zaal dus weej woorte gehaold door de dansmariekes en de sirremoniemeister. In de zaal waas ‘t bes al drök. Weej meuste op de buhn gaon staon en door de spotlights in ós gezich kóste weej neet zoeë good zeen, det waas neet zoeë fijn. D’r kwame hiel vuuël minse op ózze receptie van andere vereiniginge maar ouk femilie, vrinde, kinder van ózze klas, ‘t groeëte Wientrio en alle andere kemissies van de Wien. Weej krege vuuël maar dan ouk hiel hiel hiel vuuël kedo’s. Nao de receptie hebbe weej nog gefees. 

Op zóndaag 1 fibberwari waas de vastelaovesmis in de st. Josephparochie. In de mis meugde Kevin ein stökske veurlaeze. Nao de mis ginge weej in optoch door ‘t Greunveld achter Prins Marc 1 aan nao de Maagdenberg, op ein paerdewage. Nao de optoch waas de receptie van Marc, Nik en Chris, weej as jeugtrio meugde toen de presentjes, portemonnees en viltjes, oètdeile. Op zaoterdaag 14 fibberwari hadde weej ein echte receptie-daag. Weej ginge nao verschillende vereiniginge um de nieje trio’s te fillicitere. Ièrs nao VVV ’03, de prins hoot ouk Kevin en de adjudante Pim en Stan. Heejnao nao de Päörtjes en nao de Kwas. Beej de Kwas krege weej ouk nog ein medaille van ‘t groeëte Jocus trio det net nao boète kwaam. Dit waas bes stoer. Nao de officiële recepties ginge we met ‘t klein gezelschap nao Auxiliatrix nao de opa van Gina, dit waas erg moeëj um te doon. 

Op zóndaag 15 fibberwari hadde weej de “Blièricksen daag “, ’s morges met de bus nao Blièrick um te óntbijte beej Prins Marc thoès, daonao nao de receptie van ‘t trio van de Wortelepin en de receptie van Beledoko. Naodet weej ‘t trio gefilliciteerd hadde ginge weej nao de receptie van de Vaegers wao ‘t groeëte Wientrio ouk waas. Prins Marc, Nik en Chris hebbe toen nog eur waal bekinde leedje de “ Vastelaovestrein” gezónge, dit brach de sfeer d’r gelièk good in. 

Vrièdaag 20 fibberwari hadde weej Vastelaovend op de Greuneveldschoeël, ’s morges beej de ónderbouw in het jeughoès en ’s middaags beej de baovebouw in de hal op schoeël.

As speciale verrassing zien weej ’s morges ouk nog effe nao de receptie van Prins Leon gewaes in de Maagdenberg. ’s Middaags hebbe weej same met het groeëte Wien trio en ‘t trio van VVV ’03 nog gezellig gefees op schoeël same met alle lièrlinge van de baovebouw, en later nog nao de receptie van het kwartet van de Madsonclub. 

Zóndaag 22 fibberwari hebbe weej meigeloupe met de kinderoptoch van Jocus, weej meuste lang wachte veurdet weej aan de beurt ware maar ‘t waas waal erg leuk. Nao de optoch nao de receptie van Jocus Toekoms, same met Marc, Nik en Chris zien weej ‘t  trio gaon fillicitere. Daonao nao de receptie van de Moeraskwakers in ’t Ven dao ware weej super snel aan de beurt. 

Dinsdaag 24 fibberwari, de Boerebroèlofdaag, ginge weej met ‘t trio en ózze femilies brunche in de Maagdenberg, det waas erg leuk en lekker. Daonao is idder veur zich nao de stad gewaes veur de Boerebroèlof. Um 23.00 oor ware weej allemaol weer in de Maagdenberg wao weej veur de letste kièr met ‘t groeëte trio op de taofels gefees hebbe. Um 24.00 oor meuste weej allemaol nao boète um de vlag te strièke, nae neet met ein strièkièzer! De groeëte Wienvlag ging oèt de vlaggemas as teike van ‘t ind van ‘ne geweldige Vastelaovend.  Dit waas bes waal emotioneel en sómmige (dus idderein) meuste dan ouk waat träönkes laote. Weej as jeugtrio van de Wien hebbe ein gezellige, coole, geweldige, leuke, fantastische maar veural super vastelaovestièd gehad um noeëits te vergaete!!

Prins Kevin I

Adjudantes Gina en Loeky



<<< gank truuk nao de trio's van alle jaore