Jeugtrio 1996:

Prins Luuk I Arnoldussen

Adjudant Ellen Elsenberg

Adjudant Nicole Braams

Veurzitter: Henny Crommentuyn

Miene Vastelaovend waas de leukste van allemaol, maar ja waat wil se as se prins bis.

D’n aovend det ik as prins gevraog woort, waas eigelik gans gewoeën, wies det d’r gebeld woort, want toen woort ‘t pas spannend. Wae kwaam d’r? Wat kwame zeej doon? En zó’n dinger allemaol. ‘t Bleek det ‘t de veurzitster van de Wienjeug waas. Zeej kwaam mich vraoge of ik jeugprins woel waere van de Wien.

Ik zag netuurlik jao, want det wilde ik gaer. Wie d’r ein twieëde kièr gebeld woort, meuste weej allemaol stil zien. Ik meus ein maske veur en meus op de bank gaon zitte. De prins van de Wien met zien adjudante waas binne gekómme. D’r woort alweer  ‘n kièr gebeld en d’r kwaam emus naeve mich zitte, ik wis neet wae. Later woort d’r weer gebeld en weer kwaam d’r emus naeve mich zitte. Effe later woort d’r door Prins Mart I dreej verhaolkes verteld. Die naeve mich zote, meugde ‘t maske aaf. Toen woort mich gevraog, wae d’r naeve mich zote. Ik zag, links zit Nicole Braams en rechts Ellen Elsenberg. Toen moch ik ‘t maske ouk aaf en krege weej de mantels um, de mutse op en de medailles um. Heejnao krege we vlaai en drinke.

Vriédaag begós ‘t al, van die en die zitte in ‘t trio, maar nemus wis ‘t zeker. ‘t Waas redelik good vol te halde. En toen waas ’t intelik zaoterdaag.

Weej woorte ónthölt, ‘t is ein hiel leuk moment as se dao op de buun steis.  Allein van te veure in die kabouterpakke waas waal bale. De vergings d’r bijna van de hets!!!!

Op zóndaag begós ‘t metein good, we ginge in de optoch mei nao de Maaspoort. Weej meugde op de buun zitte, terwièl ‘t groeëte Wien-trio eur resepsie had.

Ein waek ging veurbeej en op zaoterdaag zoot ós schema weer vol. We ginge van Maria Auxiliatrix nao ein verjeurdaag en daonao nao Loreal.

Op zóndaag ware weej oètgenuuëdig beej de Venlonazaal, dao woort ’t nieje trio van Jocus Toekóms bekind gemak.

Weer ging d’r ein waek veurbeej en op zóndaag ginge we nao: D’n Dörpel. Dao hadde ze veur ‘t ièrs ouk ‘n trio. Vandao-oèt zien weej nao Beledoko gegaon. Dao waas ‘t gezellig, maar waal erg drök.

Vrièdaags hadde weej op schoeël Vastelaovend. Det waas ech kei en kei gezellig.

De zóndaag dao-op zien we nao ‘t Knibbelke gegaon, dao had ‘t trio van Jocus Toekóms eur receptie. Kei drök, maar waal super en super gezellig.

Nou geej zeet waal weer, ‘t waas veur ós ein te gekke Vastelaovend.

Idderein dae heej aan mei haet gewerk, zoeë-as ós elders en de Jeugkemissie, bedanke weej hertelik.

Groetjes, Prins Luuk I Arnoldussen

 

 

 

 

Dónderdaagaovend zoot ik vol spanning te wachte, umdet mien tante mich zoel ophaole um te schaatse. Toevallig ware mien zuskes en broor weg. Maar in plaats van det mien tante mich kwaam ophaole, kreeg ik ein vastelaovesmaske op en meus in de auto gaon zitte. Heej kreeg ik te huure det ik adjudante woort van ‘t jeugtrio van de Wien. Det vónd ik metein hartstikke leuk.

Weej reeje (met vuuël umwaeg) weg. Ièrs dach ik det we nao de Maagdenberg reeje, maar ik had het mis. Weej reeje nao Luuk Arnoldussen (de nieje Prins) wat later bleek.

Beej Luuk binne woort ik snel umgekleid en meus ik op de bank gaon zitte. Nao ein lang gedich had ik in de gater, det we d’r naeve zoote: Luuk en Nicole. ’s Aoves hadde we nog ein gezellige aovend en um elf oor nao hoès.

Adjudante Ellen

 

 

 

’s Aoves meus ik eigelik nao eur toe, zoeë-as iddere dónderdaagaovend, maar deze kièr hoofde ik neet te gaon. Det vónd ik raar, want normaal mót ik gaon ouk al heb ik gen zin. Nou ja, opens ging de bel. ‘t Waas Wilma Jacobs. Nao ein tas kóffie vroog Wilma of ik adjudante woel waere. Zoeë-iets had ik al verwach. Ik zag netuurlik waal jao!  Ik meus mich umkleie en kreeg ein maske op. Weej stapde in de auto en reeje de Hei op. Toen weer ein berg aaf. Toen stapde weej örges oèt, ik wis neet wao.  Weej ginge nao boète en ik meus op ein bank gao zitte. Nao ein lang gedich woort min maske aafgedaon. Naeve mich zoot Luuk en dao naeve zoot Ellen. Ik vónd ‘t metein ein leuk trio.

Weej hebbe wies ’s aoves laat beej Luuk gezaete. Weej hebbe geklets, spelle gedaon etc.

Um elf oor ginge weej nao hoès en ik meus metein nao bed.

Adjudante Nicole



<<< gank truuk nao de trio's van alle jaore