Jeugtrio 1995:

Prins Chris I Nellen

Adjudant Annemiek Hendriks

Adjudant Meike van Dorland

Veurzitter: Henny Crommentuyn

Op de Greunveldschoeël gónsde ‘t al de ganse tièd van geruchte, maar nemus wis ‘t zeker. Wae zal noow dit jaor de nieje prins waere, of wuurt ‘t weer ein prinses?

Wies daen aovend begin fibberwari. Mien moder zag mich, det ze opgebeld hadde van De Wien. D’r waas ein lid van de Raod van Elf krank gewaore, of ik dan toch neet mei woel doon. Dan moos ik waal s’aoves klaor zitte umdet d’r ein foto van de Raod gemak meus waere. Umdet ik veurig jaor ouk al in de Raod gezaete had, leek mich det erg tof en ik zag netuurlijk jao!

Toen ik um ein oor of zeve in mien moëiste kloffie zoot te wachte, woort d’r gebeld. Ut waes Leon. Efkes later kwaam Henny. Nao wat gebabbel en wat umhaer gedreij beej ein tas kóffie kwaam de verrassing: Leon vroog mich of ik dit jaor jeugprins van de Wien woel zien. Ik wis neet waat ik hoort en meus ‘t efkes tot mich door laote dringe. Noow, jao!! Waat ein ièr!!!

Toen kreeg ik ein maske op zónder gate in de ouge, zoeëdet ik niks kós zien, want mien adjudante kós ik toen nog neet en det meus tot ‘t letste moment geheim bliève. Dao ging de bel alwaer, en ik hoort van achter mien duuster maske waat geschuuvel en gefluuster. Spannend jong! Dao begós eemus, ik wis neet wae, ein lank gedich veur te laeze. Ein veur ein ginge de maskes aaf en toen det van mich as letste aaf moch, zoog ik ’t pas; de laezer waas nemus minder as Prins Jos II van de Wien, dae same met zien adjudante Gè en Huub in vol ornaat beej ós in de hoèskamer zoote. As adjudante zoote Annemiek en Meike naeve mich op de bank, waat ein verrassing!

‘t is bièstig gezellig en laat gewaore daen aovend. Zaoterdaag 4 fibberwari waas de jeugmiddaag van De Wien in de Maagdenberg. Gewoeën verkleid um nemus waat te laote merke, maar toch waal erg zemelappig ginge weej dao nao toe. Stiekum umtrekke en dao stónde weej dan op de buun. Met (‘t zelfde gedich as beej ós thoès) woorte ein veur ein de leeje van ‘t trio ónthöld. Weej krege ôs Mutse op, mantels en schoeëne medaljes um. Nao ‘t veurlaeze van de Proklammasie kós t bal éch beginne! En waat veur eine bal. Nemus heelt ’t druueg (d’r woort hiel waat aafgezweit). ‘t groeëte en kleine trio deej volop mei.

Beere gezellig!!

Net zoeëas de resepsie later dae middaag.

Jaomer genóg, maar ouk begrièpelik, ging door de watersnoèd de  Wienintoch en de Groeëte Wienresepsie in de Maaspoort neet door. As alternatief waas der eine kleine rôndtoch door ‘t Wienrièk um toch idderein met ‘t groeëte en kleine trio kinnes te laote make. Weej kwame zelfs beej ós thoès naeve! 

De kleine resepsie in de Maagdenberg, de zittinge en resepsies van de andere jeugvastelaovesvereiniginge; alles ging as eine roes veurbeej.

Met dank aan  de Raod van Elf, de jeugkemissie van De Wien en alle andere minse die ós geholpe hebbe, hebbe weej eine ónvergaetelikke vastelaovend gehad. Names Annemiek en Meike en ouk namus mich zelf: HARTSTIKKE BEDANK!!!

En veur idderein dae dit lues en meschien ouk nog ens de kans krièg de Raod van Elf of zelfs lid van ‘t trio te waere, heb ik maar ein advies: DOOT ENS MEI!!! 

Ald Prins Chris I en zien adjudante Annemiek en Meike



<<< gank truuk nao de trio's van alle jaore