Jeug kemissie

Al waat de groeëte in ‘t groeët doon, duit de jeug in ’t klein. Daoveur zörg groeëtendeils de Jeugkemissie, uiteraard met behölp van vuuel andere kemissies.

In september begint de kemissie al met vergadere zoeëdet de veurbereidinge van de aktiviteite tiedig geregeld zien.

De Greunveldschoeël en de Wienleje waere benaderd um de jeug te porre um lid te waere van de Raod van Elf en um zich op te gaeve as kandidaat veur ein van de vuuele andere funksies, die jäörliks vakant zien, zoeëas Prins(es), adjudant, vors, sirremoniemeister of dansmarieke.

De schoeël stelt, ónder strenge geheimhalding, ’t Trio same en de euverige funksies waere in euverleg met de schoeël ingevöld.

De elders van ’t nieje Jeugtrio waere ingelicht, geheime vergaderinge waere belag en vervolgens begint veur eur ’t lange wachte. Óndertösse is de Jeugkemissie volop bezig met alle veurbereidinge veur ’t kómmende Vastelaovesseizoen.

Dan kump ’t wiekend van de jeug!!

Meistal dónderdaags veur ’t wiekend kump ’t nieje Jeugtrio in beslaote gezelschap oèt. Det is ein hiel gebeure wao de nieje groeëte Wienprins op ein geheime lokasie ’t nieje Jeugtrio oetröp. Dit is altied eine hiele emotionele aovend umdet ’t Jeugtrio zelf nog neet wist det zeej in ’t Jeugtrio kwaame. Uiteraard weite eur elders det al lang!

Vriedaags ’s aoves is dan de JoeksAovend. Dit is d’n oetroop aovend dae gehalde wuurt in Grand Kefee Maagdenberg en wao idderein welkóm is. Op dezen aovend kump ’t nieje Jeugtrio offisjeel oet. Dit is veur ’t nieje Jeugtrio, te midde van femilie, vrinde, bekinde en vuuel kinder van eur schoeël, ein hiele spannende gebeurtenis.

Zaoterdaagmiddag is de Jeugmiddaag veur alle kinder van de basisschoeël met netuurlik de prissentasie van ’t nieje Jeugtrio en optraejes van inkele artieste. Ouk kump de groeëte Wienprins effe kieke. Van te veure is d’r altied kaartverkoup op de Greuneveldschoeël of beej ein van de Jeugkemissie-leje thoes. Veur de echte late beslissers zien d’r ouk nog kaarte te koup in Grand Kefee Maagdenberg.

Nao de Jeugmiddaag blief ’t ganse Jeuggezelschap gezamelik aete in de Maagdenberg. Daonao is aansloetend de resepsie. Idder jaor kómme dan weer hiel vuuel minse ’t nieje Jeugtrio fillisitere.
’t Is óndertösse ingebörgerd det nao de resepsie met mezièk remmiedemmie wuurt gemak wies in de late eurkes.

Ein waek later is ’t d’n daag van ‘t groeëte Trio, wao ’t Jeuggezelschap diek aan bod kump.
’s Morges gaon de dansmeriekes, de vors, de sirremoniemeister en netuurlik ’t Jeugtrio nao de H. Misin de Femiliekerk. Naodet de Jeugprins(es) ein gedich haet veurgelaeze en pestoeër de zaege haet gegaeve, geit ’t Jeuggezelschap nao boete wao de ganse Jeugraod van Elf al op eur wach.

Beej de Femiliekerk begint d’n intoch door ‘t Wienerrièk wao hiel waat snoep oetgedeild…én opgegaete wuurt! Uiteraard met ’t Jeugtrio op eure eige Vastelaoveswage. D’n intoch eindig beej Domani in hertje Venlo wao idderein bruuedjes en drinke krieg. ’t Ganse jeuggezelschap geit noow traditioneel as ein van de ierste groepe de groeëte Prins fillisitere op eur resepsie.

Nao ein waek rös, zien d’r weer ein aantal resepsies, die weej netuurlik neet euverslaon. Daags daonao volg ’t champagne óntbijt beej de groeëte Wienprins en ’t aafloupe van diverse resepsies.
Same met de groeëte Wienprins op ein buun; Wat zien ze gruuëts !

En dan.. is ’t al vastelaovend. Te beginne met de Jocus kinderoptoch op zóndaag, wao weej netuurlik met meitrekke. Aansloetend gaon we dan ’t kwartet van de Moeraskwaakers fillisitere.

As aafsloèting van eine prachtige Vastelaovestied steit d’r veur de Jeug op zóndaag nog de “Muts van de Bluts” gepland. ’s Aoves nao de letste resepsie wuurt in Aetcafé De Alde Mert ’t Jeugtrio offisjeel veur ’t letst dit seizoen de Muts aafgezatte. Eine zier emotionele gebeurtenis, moeëj aan mekaar gepraot door speciale gaste, en wao menig treunke wuurt weggepinkt.
Ein traditie is gebaore!

En dan is ’t gedaon.

Aevel neet veur de Jeugkemissie. Naopraote met de elders van ’t Jeugtrio, planne make veur ’t volgend jaor, de begruuëting opstelle, enz. Ouk is d’r dan gelökkig tied veur ’t jaorliks oetstepke, det de motor weer mót oplaaje veur ’t nieje seizoen. Wies de ierste vergadering weer begint in September…….. 

De leje van de Jeugkemissie zien:

  • Marc Verheyden, veurzitter
  • Fred Peters, vice veurzitter
  • Miriam Peters, penningmeister
  • Caroleyn Storm
  • Dorry van Es
  • Monique Rijk
  • Nancy Roodbeen
  • Ingrid Geurts 
     


Kóntakpersoeën: Marc Verheijden (Veurzitter)
Tillefoon: 06-28 49 24 17
E-mail: marcverheijden@tiscali.nl

De Wien Venlo

De Wien Venlo

De Wien Venlo

De Wien Venlo