Historie

Vastelaovesvereinging De Wien is ein van de groeëtste beej de BCL (Bond voor Carnavalsverenigingen Limburg) aangeslaote vastelaovesvereiniginge. De vereiniging is in 1967 opgerich in ‘t buurtschap Maagdenberg te Venlo.

De naam is aafgeleid van de Wienhuuskes aan de Maagdenberg. Zie foto.

Tiejes ein gezelligen aovend in ‘t buurtkefee, woort door inkele minse ‘t idee geopperd um ein vastelaovesvereiniging op te richte met ein prins oèt de umgaeving.

Prins meus idderein kinne waere en neet allein de veuraanstaonde minse in de stad. Dit typeert ‘t soort minse die in ‘t buurtschap Maagdenberg destièds woeënde. Heej woeënde namelik vruuger vuuël gerdeneers, die eur bedrièf in ‘t achterliggende gerdeneersgebied Greunveld hadde. Noow de buurt is oètgebreid met vuuël niejbouw en ein gans niej stadsdeil, woeëne d’r nog steeds vuuël jóngere in de umgaeving wao zeej vruuger zien opgegreuid.

‘t Ièrste evenement waas ein prinsebal. Op dit bal woort de nieje prins bekind gemak. Snel volgde nieje evenemente zoeëas ein zittingsaovond, leedjesaovond en receptie. ‘t Eige buurtkefee woort snel te klein veur de receptie en d’r deende ein andere accommodatie gezóch te waerde. De stadsschouwburg geneump “de Prins van Oranje”, loog in ‘t buurtschap Maagdenberg en woort as meis ideale locatie gekaoze. Heej door kreeg De Wien bekindheid wies vaer boète de stad Venlo. Taegeswaordig wuurt de receptie in de Maagdenberg gehalde en de prónkzitting in de stadsschouwburg De Maaspoort.

Momenteel haet De Wien ein aantal vaste evenemente. Weej starte in september of oktober met de leedjesmatinee. Heej waere de beste leedjes gekaoze veur ‘t nieje sezoèn. Al dees leedjes zien verieëuwig op single, cassette of CD. Nao d’n elfde van d’n elfde volg “t aaftraeje met joeks”. Det is ein bónte aovond met ‘t optraeje van inkele artieste. Tiejes dezen aovond traejt de Prins aaf. Metein nao de jaorwisseling kump de nieje Prins oèt tiejes ‘t PrinsenGala. Dit is euverigens idder jaor de ièrste Prins in Venlo dae bekind wuurt gemak.

D’n daag nao ‘t prinsengala wuurt de vlag in top gehese as blièk van äöpening van d’n tièd van Vastelaovend. Aansloètend ein kleine receptie veur leeje en directe femilie. Ouk aan de jeug wuurt aandach bestaejd. In samewerking met de Greuneveldschoeël, wuurt ein raod van elf en jeugtrio gekaoze, die tiejes ‘t jeugbal bekind waere gemak.

Veur aanvang van de groeëte receptie, wuurt ein Heilige Mis georganiseerd in ‘t dialek. Deze wuurt gehalde in de H. Familiekerk te Venlo. In optoch geit ‘t ganse gezelschap nao de Maagdenberg, wao de receptie wuurt gehalde. Deze receptie wuurt door vuuël minse en vereiniginge bezóch. Ein van de bekindste Prónkzittinge, ein produk van de Wien, wuurt gehalde in ein jaorliks oètverkochte Maaspoort.

De woensdaag veur Vastelaovend wuurt in samewerking met de seniorevereiniging van de Maagdenberg een vastelaovesaovond georganiseerd. Daonaeve bezuk de Prins al jaorelang, in samewerking met de stichting Zonnebloem, kranke minse oèt de buurt. In de zomer wuurt ‘t sezoèn aafgeslaote met ‘t inmiddels bekinde Midzomerfestijn.

Geej zeet det de Wien ein sociale cultuurvereiniging is veur jónk en ald en stelt zich ten doel veur eur leeje de Venlose Vastelaovend te bevordere en in stand te halde.

De vereiniging trach dit doel te bereike door ‘t organisere van allerlei aktiviteite wie vastelaoveszittinge en -bals, maar ouk door andere aktiviteite die dit doel kinne bevordere wie beejveurbeeld ’t Midzomerfestijn.

Postadres: Postbus 255, 5900 AG Venlo

E-mail: info@dewien.nl

Residensie: Grand Kefee Maagdenberg


De Wien Venlo